– سنة 1986 فمونديال المكسيك ، و بعد التأهل للدور الثاني جينا مع لاليمان و ما أدراك ما لاليمان .. لعبنا معاهوم 88 دقيقة الند للند .. و بينما كان الجمهور المغربي كيعتقد أننا جرينا رفاق رومينيغي للأشواط الإضافية باش نشلطوهوم بشي هدف قاتل و ندوزو لربع النهاية .. جات ضربة خطأ مباشرة على مشارف مربع الزاكي .. تكون الحائط المغربي .. منين بغا الثعلب ماتيوس يسدد ، باك احسينة غير ما جاه خرج من الباريير .. قذفااااا نيشان للمرمى و نوضوا على سلامتكوم !!! – سنة 1992 .. كأس إفريقيا بالسنغال .. المباراة الأخيرة للدور الأول ضد الزايير .. كان خاصنا نربحو باش ندوزو للدور الثاني … 90 دقيقة و حنا هاجمين و والو .. دخلنا للوقت بدل الضائع .. جا سونطراج من ليمين نحو مربع الزاييرين .. طلع ليها المهاجم الركبي و جابا فالقنب … اهتز المغرب كامل فرحان .. ما جينا نرجعوا للكراسا ديالنا حتى جبرنا الزايير فرحانين بهدف التعادل … و نوضوا تعلاو !! – سنة 1994 .. مونديال الميريكان … الماتش الأول ضد بليجيكا .. لعبنا ضد العارضة ديال ميشيل برودوم .. الشاوش عيا ما يشير ، ربعة ديال المرات فالحديدة .. طلعوا لوخرين طلعة وحدة ماركاو هدف الانتصار … الماتش الثاني قلنا الساعودية غادين نبردوا فيها الغدايد ديال بلجيكا .. ساعا جا الشيخ ديالوم فؤاد أنور و شير على عزمي من يثرب و جابا لاصقة و قالونا يالاه الطيارة اللي جابتكوم تردكوم !! – سنة1998 .. مونديال فرنسا .. كان عندنا فريق قوي بقيادة هنري ميشيل .. دخلنا للماتش الأول ضد النرويج .. اللعابة كيسجلوا و الحارس بنزكري اللي منعرف شكون عيطلو للمنتخب كيقفقف غير بوحدو و كيعطيهوم فالكادوات .. خرجنا بالتعادل رغم أن الماتش كان فيدينا .. جا الماتش الثالث ضد اسكتلندا اللي بقينا عليه غير للراس .. ثلاثة لزيرو و كلشي فرحان بالتأهل للدور الثاني حتى قالوا لنا نوضوا على سلامتكوم راه النرويج سجلت هدف الانتصار فالدقيقة اللخرة من ضربة جزاء !! – سنة 2004 … كأس إفريقيا .. رغم أن حتى واحد ما كان كيراهن على المغرب ، الزاكي و اللعابة نتاوعو وصلوا للفينال ضد البلد المنظم تونس .. ماركاو علينا بخطأ دفاعي ديال الكوانب … رجعنا فالنتيجة بهدف جميل ديال المختاري .. حتى قلنا أن منتخبنا الوطني غادي يستغل الضغط اللي على تونس باش نشلطوهوم بشي كونتراتاك و نديو الكاس من قلب ملعب رادس … جات كرة شايطة .. طاح عليها الحارس فوهامي فحال إيلا باغي يقبط فروج هارب .. فلتات ليه و جبرات المهاجم التونسي على باب الله و قالنا هزكم الما !! نزيد و لا باراكا !
