الأمة المغربية: أصالة التاريخ وحقيقة المواقف

أمين أحرشيون
الحكمة هي أن تعرف من أنت، والكرامة هي ألا ترضى بغير أصلك بديلاً. من وحي الواقع والمواقف التي كشفت لنا معادن الآخرين، نكتب اليوم عن الهوية المغربية في أسمى صورها. نكتب عن تاريخنا الأمازيغي العريق، وعن وحدتنا التي لا تحتاج شعارات، وعن قصة شعب يرفض التبعية ويعشق الحياة بكرامة.
إن الحكمة الحقيقية هي تبدأ من الرضا عن النفس والصدق مع الذات، والرجولة هي تكون بحال الجبل، لا تبيع راسك ولا تخون مبادئك وخا تكون الخسارة، المهم هي عزة النفس. الحكيم هو اللي ك يمد يده بالخير وك يعطي أحسن ما عنده، حيت الكرم هو اللي ك يبين معدن الرجال الأحرار، عكس اللي عايشين في الأوهام وتحت رحمة القطيع. المغرب ماشي غير بلاد، المغرب أمة وعقيدة وفكر ك يجمعنا كاملين، وتاريخنا الأمازيغي هو الساس اللي مبنية عليه هاد العظمة، حكاية ضاربة في القدم ومنقوشة في قمم جبال الأطلس.
حنا ولاد هاد الأرض، "سبوعة" أحرار، أصلنا أمازيغي وما ك نكونوش بخلاء على نفوسنا بالاعتراف بجذورنا. العروبة تعلمناها بقواعد السياسة واتخذناها وسيلة للتقارب، ولكن في الأخير تأكدنا أن أهل العروبة في اليمن والخليج هما أماليها، وحنا أمالي "تمغرابيت". اكتشفنا في هاد الطريق العجب، وعرفنا أن المنافق هو اللي ك يحقد عليك غير حيت شاف قيمتك وسيرتك الذاتية أقوى منه. في محطات بحال "الكان" بانت الحقيقة، وعرفنا قيمة للي ما عنده قيمة، وتأكدنا أن الوحدة الحقيقية ماشي هي شعارات العروبة اللي بقات غير حروف ونقط كاحلة، بل هي وحدة الأمة المغربية اللي ك ترفض الانكسار.
حنا عطينا الكثير وما لقينا غير النقمة والمشاكل، واليوم وصلنا لنهاية الطريق مع شعوب ما ك تفهمش معنى تمغرابيت. حنا أمة قايمة بذاتها، فكرنا مبني على نفوسنا، متمسكين بأصلنا الأمازيغي وبديننا وقيمنا، ومجموعين تحت راية واحدة وببيعة صادقة لأمير المؤمنين. هادي هي قصتنا، وهادي هي حياتنا اللي ك نعشقوها ونعيشوها بأفكارنا الحرة، وديما المغرب مزروع في القلب حتى الممات.