بالطنجاوية.. دابا واش ندخلو ولا نخرجو؟ وواش غتخليونا نبحرو هاد العام؟

الروينة.. بزاف دالناس فطنجة ما فهموشي علاش تعاود تفرض هاد الحجر الصحي فالمدينة كاملة، وشوية قالك لا والو كاين غير فشي حوامي، هادشي خلا بنادم ما عارف راسو من رجلو، دابا واش غنخرجو ولا نبقاو فالديور ديالنا؟.
الولاية بارح فالنص دلليل قاتلك أسيدي، مدينة كاملة غنشودوها حيث هادشي الي واقع بزااف وكنخافو عليكم تمرطو، نعسنا ونوضنا، جبرناها بدلات الرأي ديالا، قالت دابا واخا تخرجو ولكن ناس الي ساكنين فبني مكادة لاء خصوم يدخلو للدار فالثمنية، ولكن فنفس الوقت الجوامع مفتوحين، دابا واش ناس ديال ديك المنطقة يصليو المغرب والعشا بالتقديم ولا كيفاش.
هاد الروينة خلات بنادم تالف، وكيطالبو بلي السلطة تخرج تشرح شوية باش على الله يدينا النعاس هاد الليلة، حيث حنا عاد فرحنا ملي خلاونا نخرجو من بعد كثر من تلت شهور ديال الحجر.
بنادم فالفايسبوك بدا كيقول بلي طنجاوة مستهترين وماشي ملتزمين عليها هما من دون الناس رجعولوم الحجر ومنعوهم يبحرو، حتا حنا ما سكوتناشي مشينا سقصينا فبزاف دمواطع، باش نعرفو علاش طنجة بالضبط، غير هو تا واحد ما جاوبنا، وشي واحدين ما بغاوشي تعرف الهوية ديالوم قالولنا بلي الجو ديال طنجة خايب عليها الحالات ديال موت كاين بزاف، والحجر تفرض عاود باش يحمي ناس كبارين، ولكن إذا كان هادشي بصح علاش ما خرجاتشي الوزارة تقولو، ياك الوزير عاد كان عندنا هنايا.
شي واحدين مطورين قالك اسيدي بلي هادي خطة ماسونية باش ننساو القضية ديال البحر ونحمدو الله على أنهم ما شادوشي علينا عاود…
ولكن السؤال الي المهم دابا هو : فوقاش غيخليونا نبحرو؟ توحشنا سراطوس
* بالطنجاوية.. واحد الفقرة أسبوعية كتكتب باللهجة الطنجاوية، الهدف منا بدرجة اولى هو إعادة إحياء هاد اللهجة وبعض الكلمات القدامين الي بداو كيتنساو، وعتكون مناسبة باش نتطرقو لبعض المواضيع الي كيهمو الناس دلمدينة
وا غايتو نتلاقاو سيمانة لي ماجة مع فقرة اخرى