حق الأسبقية

سبحان مبدل الأحوال كلشي رجع داخل سوق راسو (ماشي سوق مرجان !!) كلشي شاد اليمين ديالو، توحشت نسمع الكلاكسون والسبان والفريا فالطريق... ياسلام الصمطة (لااا ماشي ديال السروال!!) رجعت عادة حتى فالدار..كلشي مزيارها مزيان!!
الضوء الأحمر مابقيناش نحترموه لا ولينا كانحتارمو االفوروج كامل ومابقاوش عندنا جوج ريوس واحد يقولك صطام راه باقي ليشيني (برتقالي) وواحد يقولك إلا ماكانينش البوليسي راه دائما أخضر وماعندناشي الوقت نضيعوه!! رجع عندنا راس واحد كايقولك النقيطات أمامكم وابوزعبال(السجن) من ورائكم ومانقولكمش على الشراطي (نوون ماشي ديال الكوكايين!!) واااديال الراجيلين وااو واش حنا فالمغرب؟! محال!
أما واحد للا مولاتي حق الأصبقية فحال لي أنت داخل نشي فرح كلشي كايقولك زيد آمولاي أنت الأول أسيدي.. بشااااخ على الديبلوماسية فالرومبوان!!!
دخلت عليكم بالله أش واقع واش حنا كامونيين حتى لهاذ الدرجة؟ واش السي غليليب كايخلاع؟ فين كان مخبع هاذ الآدب والإحترام وهاد التمدن المفاجئ؟ أو!! الطاكسيات رجعوا كايسوقو ساكتين؟ العجاب!!!
البرمي رجع كامل نقيطات مابقاوش يقولولك واش عندك بيرمي ا شحال من بوان باقيلك فيه ...لغة جديدة هذي !! أما وحد عمي البوليسي عا يمشي يعمر الكلمات المتقاطعة راه الشعب كامل رجع بوليس وقاريين دروسهم وحافضنها مزيان وحاديين سوارهم والله الفرنك لاصورته والمخالفة وخا فالمنام ماتحلمش بها !!
الحاصول ماينفع عالمعقول والنقيطات.. لنغيير سلوكنا؛ نووون ماشي ديال الضوء... أوو!!!