الخطاب الملكي والمنظومة التربوية

ثار نتباهي واحد المقال قريتو فى "هيس بريس" اللي قال واحد "المحلل السياسي المغربي" أن الخطاب الملكي كايحث على أن المنظومة التربوية خاصّها تكون " على شاكلة الثورة الصينية الثقافية".

كون كان مطّالع هاد "المحلل" ضروري يخجل، ما عمّرو ما يتفوّه بهاد الكلام اللي كبر منّو، "ماوو تسيطونك" قام "بالثورة الثقافية" لأنه بغي إصفّي حساباتو السياسية مع اللي كانوا كاينتاقدوه، أو "الثورة الصينية الثقافية" كانت فى العمق طوفان من البزق، القيح أو الدمّ، فاين جميع المثقفين، المفكرين، الصحفيين، الفنانة، الأساتذة لا ديال السلك الأول، الثاني ولا ّ الجامعي كانو معرّضين لَشتم، السب، القذف، التشهير، الشنق، الإنتحار أو هدر الدم، الملاين ديال الصينيين الأبرياء تهانوا، تعذّبوا، تنفاوْا، تقتلوا فى هاد الفترة، أو مورى هاد الأعمال البشعة كولّها كانت "مادام" "ماوو تسيطونك"، "دجيان تشينك"، اللي كانت كاتفتاخر أو كاتقول: "كونت أنا كلبة ماوو، غير كايقول ليّا عضّي، كانعضّ."

عاد كايبغي إجي هاد "المحلل السياسي" أو يعطينا دروس فى "الثورة الثقافية الصينية"، بحال إيلا ما عندنا عقل أو اللي قال شي حاجة خصّنا نتبعوه، ما مشاوْا الصينيين الأحرار "ديال المعقول" حتى عدْموا هاد المستبدة، الطّاغية، هي أو رباعتها، أو الصّينيين كايقولوا بنفسهوم اليوما أن "ماوو تسيطونك" قام بأشياء سلبية نسبتها ثلث أو أن الإجابيات حصّتها ثلوثين، لأنه وحدّ، لم ّ الشّمل، أمّا الصّنيين اللي عايشين فى المنفى عندهم رييّ آخور.

أو نتبعوا كاع "هاد المحلل السياسي" فى تخريفاتو، حتى إيلا كانت شي "ثورة ثقافية صينية" الصّينيين كايستعملوا لغة حية، ماشي مييّة، كيف كايتكلّموا كايكتبوا، ماشي بحالنا، كانهضروا فى شكل أو نكتبوا فى شكل آخور، أو ما حدّنا ما حلّيناش هاد الموشكيل، غادي ديما نبقاوْا اللّور أو كانفرّخوا غير فى البطالة كيف جا فى الخطاب الملكي، فى اليأس، عدم الأمن أو المستقبل المجهول، موشكيل المغرب موشكيل الأداة باش غادي نقراوْا أو نكتبوا، ماشي فى الكفاءات، الكفاءات، نوابغ عندنا ولاكن ما كانعرفوش كيفاش نوظفوا رأس المال البشري أو كانخلقوا فرقات، توتّرات جتماعية، حقد، كراهية اللي كاتفجّر "بين الحين والآخر" فى حتجاجات، صطدامات، وقفات أقصى سقفها مطالب جتماعية: 1. حق فى العيش الكريم أو 2. إكونوا المسؤولين فى المستوى المطلوب، ماش كايمتاهنوا الكذوب أو التملّص من المسؤولية، لأن "الصدق أمانة والكذب خيانة"، مللّي كانحلّوا عينينا أو حنا كانكذبوا على بعضياتنا أو

على نفوسنا، هاكدا كانتوفّروا على مجتمع مهزوز، خاوي من الدّاخل، الدّانماركيين كايركّزوا من الصغور على "الثقة و عدم الكذب"، فى الرّوض كايتعلّموا هاد الخصل الحميدة، أو حنا مدّينها غير فى الخزعبلات: "كون راجل"، هادوا بالربّ ما بغاوْا إخورجوا من بيت النعاس أو عايشين فى حيرة فى الحداثة، بالنسبة ليهوم الفحولة هي إيلا دافع الراجل على بنتو، مراتو، ختو، خالتو بحال إيلا ما عندهومش فومّ، ما عندهومش الحق إدافعوا براسهوم على نفوسهوم، عقلية ذكورية، متشددة بامتياز.

فى الصين 1400000000، مليار أو ربعميات مليون نسمة أو كولّهوم كايتواصلوا يوميا بلغة حية، كايصنعوا بيها، حنا باش غادي نكونوا دولة مصنعّة؟ بلغة ما وارداش فى الحياة اليومية بحال فى الصين؟ الفلاح الصّيني التّالي كايعرف إخدّم التّراكتور، أيّ آلة عطيتيه، حتى اللي كانوا البارح فلا ّحة رجعوا اليوما مصنعين، رجال أعمال أو صحاب مقاولات ضخمة كاتشتغل على الصعيد الدولي.


بلا ما نهضروا على دول أوروبا الشمالية اللي كايستعملوا لغاتهوم المحلية الحية، هادا هو موشكيلنا بامتياز، فى الأداة فاش كاتبقى، لأنها هي الأساس، ضروري ما نخلّطوش بين "العلة والمعلول"، جميع الدول المتقدمين، الناجحين كايستعملوا لغات محلية حية، ملك البلاد بنفسو كايحث على تعلّم اللغات الأجنبية الحية، ماشي على تعلّم "الا ّتينية".