محال الشدّة تدوم...!!

دارت أيام بحوالها..السوايع بدّالة
سرجو لخيول وسمعوني صوت الخيّاله
فهمو قولي أسيادي
الناس أحوالها تبكّي..كيتها من حاله
آش من خير فعيادي
إلى الدنيا بهمومها لناسي ركّاله ؟
***
طالبين الحق ماشي جود..ساعتو مذباله
بوعد الخير ومروّه ..ماشي قوّاله
بشعار"بغينا نخدمو"
عيات نفوس ماتنادي..ولقعدة قتّاله
همّه وشباب ونعملو
وتخفاف حمال اللي كنا ليها حمّاله
***
هاذ جماعه لهريف قلوبها ميّاله
طمع الدنيا اللي عماها وريوگها سيّاله
كيت المقهور فبلادي
فين ما جا عام يركزو عليه الطبّاله
وبواق الغمة كتنادي
زيرو لحزام عالأزمة راكم عوّاله
***
شحال من حد كحال سعدو
كيف المجروح اللي صابو سهم النبّاله
مدى من حد فقد ظلو
عايش معدوم كيداري همومو فنواله
مدى من حد طار عقلو
تايه شارد فتجوالو لابس دربالة
وشحال من يسعد بحوالو
وزيانت الدنيا فعيانو،دارت ليه جلاله
***
قالوا يكفيك ألمحروم خبز النّخاله
صبر وقنع بالموجود ورضى بالحاله
ناداني صوت فحلامي
محال الشدة تدوم وايامها رحّاله
مشات خسارة أيامي
وفين الناس اللي غابو..فين الرّجّاله
*****
لابد الحيرة تزول والحيرة هوّاله
ويعم الخيربناسو ماشي من والا
شرار الناس ف كل بلاد
شلا خيراتها باعو فسوق الدلاله
خْلاََوْ ديار..ظلمو لعباد
دار الزمان وعليهم كيلو كيّاله