زجل..البركاك التقليدي

شتي أنا ولد الدرب ومدرب
ولي ما تيق يجرب
ف التحنزيز كنلعب طويل
او ما عنديش مع الزكيل
يعني بصراحة أ الخوت
تويشية ما تفوت
ديما لا كارد برمانونس
وعيني خدامة أفانس
ف الشتا والبرد
فلثنين والحد
حتى الصيف الحار
كتلقاني طالق الردار
غا تضحكو وتكولو حشوما
غانجاوبكم بكلمة مفهومة
هذا نظام المعلومة
يعني التبركيكولوجي
اواكل ف العالم الخارجي
غير الفرق ف التأطير
هما بالبيرو والمدير
والانترنيت ولباراي فوطو
وحنا الحجرة والبوطو
هما بالخلاص الصحيح
وحنا كيضربنا الريح
نظلو واقفين ف القنات
ومعرضين للأفات
والنعوث وسوء الترفاك
والمتطلفين على مهنة البركاك
مكرهناش شي جمعية
حرفتنا تولي عصرية
بخيوط الربط والتشاور
ف الحومات والدواور
يعني عطيني نعطيك
وفين ما مشيتي نحضيك
نديرو وكالة تخبار
بوصيلات وحنزازة كبار
مع لخلاص المعلوم
دون احتساب الرسوم
غتكولو هذا تصطى
غير فمو وما عطى
لا... عارف أش كنكول
وها السيا والانتربول
كيجيبوها طايرة ف التبركيك
وخا تكون ف الشينوا ولافكيك
الحضيان عندهم صناعة
ودايرين قيمة للبياعة
عاد مدارس التكوين
ف تسراح الودنين
والتقاط كاع لحروف
مع استخدام الشوف
وما تكون بركاك أمولاي
حتى تدوز ف الا فبياي
عاد تاخذ الكاتريام ضام
ف التوصيلة بالتمام