غنا(ء) الحطابة

سربوا زربوا ڭبل
لايجينا مول الكْبُل
ويعاود جرّتنا في سيرة العبيد
يتسلطن غمامو..
في الحين ينزل
يوطا عنادو على جرحنا ويزيد ....
يڭد يجينا غراب
يجيب على ليالينا
كي على نهارنا جاب
يڭد يجينا بواب
يهجج خطاوينا
من قلة الحباب
يڭد يجينا حداد
مطارقو ترادفوا
والريح كيرُه زنّاد
يڭد يجينا صياد
والطيحة في منادفُه
دون جعبة ودون زْناد
يڭد يجي غفلة
يڭد يجي مهل .
يڭد يجي غلّة
يڭد يجي غل
يڭد يجي شلاّ
يڭد يجي قل
يڭد يجي محلة
ويڭد يجينا فريد
...........................
. سربوا زربوا الطّل
سيّب سمُّه و تسل
سردات ذيك لغصان
جمدات هذ لركان
يآآآه كان ڭدينا باللّي كان :
حتى المحبة صفاها دافي
حتى المْحَنّة في الصّر عوافي
والحرف المكمول الوافي
حتى هو في الكَزّ وڭيد
...............................
سربوا زربوا حبل
الحزمة.. رشا وهزل
والحطبة راها شطبة
وشوك بين الضلوع تخبا
شي منو وشلا من لعڭيد
.........................
. سربوا زربوا الحال لمفاجي
لبس لكحل
بيّتت ذيك لطيا
ر تزاڭى هاذ الوحش
والحال شحال بعيد
نعود نڭول:
ها ..طريڭهم
ذوك اللي فازوا
المشية قبلة ها لآثر
تعود تڭول:
تبعوا ريحهم
من هنا دازوا
المشية بحر ها لحافر
ها لآثر.
.ها لحافر
ها لحافر..
ها لآخر .
. وفي لحظة
ڭد لغمضة
تهدا لمْلاجّة ..تهدا
حين ينظر ذاك لحافر
باب لعذاب
ولآثر يتصاب
في الشقا مسرب جديد
..............................
كان هذا
غنا لحطابة
حين جارت
ذيك لغابة
وحرزت
على لغشيم الصّابة
حرزت
على الغشيم دخان العيد