أبراج الحكومة

قاعد
عبد العزيز افتاتي القيادي في العدالة والتنمية اعتر على واحد الجملة وقيل ديال سلفادور دالي، وقيل ديال اندري بروتون، وبغى يشرح بها الزيادة في الأسعار ديال البنزين، وهو يكولينا اسيدي: هذا الإجراء ديال الزيادة تيهدف «»إلى تحقيق نوع من العدالة الاجتماعية».
آش من نوع وأش من لون واش من جوع، الله أعلم، المهم نزيدو فليصانص وها العدالة الاجتماعية تحققت مع السي أفتاتي.
- فسر واشرح وشرح وملح... وما يبان ليك والو، وقيل بغى يكول الزيادة تستهدف لتحقيق العدالة والتنمية!!
ماكينة... ما كاينة!!
شبه مصطفى الخلفي الإنتاج التشريعي للحكومة بالماكينة، وهو يُعدد حصيلة سنة و8 أشهر من عمل الحكومة، حيث تم استصدار أزيد من 7 آلاف من القرارات الوزارية وأكثر من 1600 مرسوم إداري....
الشهادة لله، هاذ الشي راه كتير وكتير بزاف. هذا الشي راه أكثر من إنتاج تشريعي، هذا إنتاج تسريعي. غير الله يكون فعون الجريدة الرسمية وخلاص.
لكن السؤال الجوهري أمام هاذ الماكينة وللا هاذ الطاحونة، هو علاش هذا الشي كلو، إلى كان الدستور باقي ما بغى ينزل؟!
أما آن لهذا الدستور أن يترجل؟!
الجواب: أعداد، أعداد في عداد المفقودين وصافي، ولا أثر ولا خبر!
طلوع الكاز
سكان فاس طلع ليهم الكاز فالراس هاذ ليام، منين فاقو ولقاو البوطات ديال الكاز حتى هما ولا تيبوطوا فيهم.
وفاس زعما راها عاصمة علمية، وقريبة ماشي بعيدة،وناسها عارفين وعالمين،ماشي ماعارفين..، ويكون فالعون ديال الناس دلجبال، من الريف لطبقال ومن بوعرفة الازيلال، اللي مساكن غير تطيح الشتا، او الثلج او تقطع الطرقان، ديما عندهم الزيادة.. والبوطة الصغيرة عندهم اغلى من الكبيرة. اما دابا.. محال تبقى فشي جبل شي غابه!
عزل المعزولين!
قررت وزارة الداخلية تعزل ستة رؤساء ديال الجماعات المحلية. والي حيدنا شي وحدين منهم فسلا وفتمارا، نكولوا قراب من المركز. الجماعات الاخرى كلها معزولة، ما محتاجة يتعزلوا لا رؤساءها لا اعضاءها، حيث فالجماعات المعزولة، بحال هذا الرؤسا والاعضا، دايرين ديما الخلوة والاعتكاف، مع شي وحدين ديال السلطات المحلية، وحتى واحد ما عرفهم آش تيديروا، بل اكثر من هذا، حتى هما ما عارفينش آش تايديروا.
واللي ما تيعرف ما يدير، تيدير المشاكل طبعا طبعا!
الداودي باغي يحرم العيشة والمعيشة!
فالعالم كلو... منين تيولي شي واحد، أستاذ ديال التعليم العالي أو وزير ديال التعليم العالي والبحث العلمي وتكوين الأطر، تيكون انتهى من سخونية الراس ولغة القرطاس أو لغة الحمام.. حيث التعليم العالي تيحتاج للرزانة والرصانة والعقل والهدوء، وما تيحتاج لتطيار العجاج.
لكن وزيرنا في التعليم العالي، وهو كيخاطب شباب منظمة التجديد الطلابي، سخن لغتو أكثر من الشباب، واندفع أكثر من مدفع، وبدا يحرش ويحرض فيهم، ويفيق فيهم نيران خطورتهم باش يحرموا العيشة على شي وحدين.
يا الله آجيوا نسمعوا للسي الداودي آش تيقول: »خاصنا نفطمو شي وحدين، ولكن ما بغاوش يتفطمو، من كان يستفيد من الفساد لا يريد الإصلاح، لهذا انتم خطيرين عليهم، وخاصكم تزيدو تحرموا عليهم العيشة«!!
آسي الداودي، راكم ما فطمتو غير الشعب منين زدتو فالحليب، وما حرمتو العيشة غير على الشعب منين زدتو فالبنزين، أما اللوائح دالكريمات، فكاين لوائح جديدة يالله تتعطى!!
... وعبد الله باها يكمل الباهية
رغم أن عبد الله باها، في نفس مؤتمر التجديد الطلابي، بغى يبرد الطرح، وينقص من السخونية، ويحضر العقل، وما بغاش شباب حزبو ينقل مشاكل مصر للمغرب، فإنه عندما طلب منهم ياخذو بعين الاعتبار خصوصية المغرب، غاب عنو عقلو واعتبر أن المغرب استقل قبل 12 قرنا!!
أما منين بغى يمدح الحكمة ديال المغاربة اعتبر أن المغاربة «قاموا بمغربة كل شيء بما فيه الشاي الذي »»أتاهم«« من الصين، فأصبح العالم كله يعرف شيئا اسمه الشاي المغربي«!
يهديك الله آسي عبد الله، راه المغاربة مغربو حتى البرتقال منين كان تيجيهم من دولة البرتقال، ومنين كان تيجيهم من الصين اللي مغربوها المغاربة ب »»لاشين«« سماوه »لاتشين«.
طبعا من حقك أن تتحدث غير على أتاي ومن حيث أتى، لكن ما تخلعوش المغاربة أكثر، راه كلما ذكرتو شي مادة، تيكولو. ما جات على طرف لسانكم حى فكرتو تزيدو حتى هي فيها!!
برافو سهيل!
فالمناقشة ديال خطة «»إكرام»« للمساواة بين الرجل والمرأة، ناض شي صداع ما بين وزير التشغيل عبد الواحد سهيل وما بين مصطفى الرميد وزير العدل حول زواج »»السطاشيات««
الرميد يكول يمكن للقاضي بسلطتو التقديرية يزوج اللي عندها 16 سنة، وسهيل تايجاوبو: إلى كان قانون الشغل تيمنع السطاشية من إبرام عقد الشغل، كيف يسمح ليها القانون تبرم عقد الزواج.
برافو بالصح، هكذا يكون القياس، ويمكن نزيدو عليه حتى قياس رخصة الزواج برخصة البيرمي، حيث إلى كانت اللي عندها 16 عام ما مسموحش ليها بسياقة سيارة على طريق مبلطة ومعبدة وفيها إشارات وعلامات، كيف يمكن ليها تسوق أسرة على درب الحياة اللي كلو مطبات ومزالق ومنعرجات وأخطار وأدغال آسي الرميد؟!!
إلى ثلاث بالتلات تشبه الحد!
يبدو أن الخلافات بين الأغلبية الحكومية أصبحت معدية، لدرجة أن عدواها أضحت تمس كل من يخالط هذه الأغلبية،
شي وحدين، بانت ليهم الحكومة فعطلة، تتقلب على أغلبيتها، وقالوا أجيو نقلبو على شيء خلاف، باش يعرفونا حتى حنا كاينين، شافو فجنابهم ما لقاو حد، وهوما يمشيو يدابزو علي التلات ماشي الحد.
السي غلاب يقول راه التلات هو يوم جلسة الأسئلة ديال النواب، والسي بيد الله يقولو راه التلات هو يوم جلسة الأسئلة ديال المستشارين. وهكا بدا شد لي نقطع لك، تلت ما تنبت، وما بقى يخصهم غير شي غرفة تالته تحل الصداع اللي بينهم
لكن المشكل هو الى جات شي غرفة تالته، وقالت ليهم راها التلات ديالي، ومن سميتي خذات سميتها، آش غادي يديرو كاع، حدهم يشوفو الحد، وللا حتى وحد فيهم ما ينحد، ويزيدو فالصداع.
وقيل ما بقى شغل، ما دابزو على اثنين، لا على خميس، لا على جمعة.... هذي أيام بيضا عند الله، مدابزين على التلات.. والتلات مسكينة ديما تتشبه ميت العصر، ما تدي اخبار ما تجيب اخبار.
وقيل مخاصمين على ميت، والله يحد الباس وصافي، راهم تلاوها حتى بالتلات، وقيل الحد غدي يولي احسن منها!!