عداوي 15 : آش خاصك؟

يا الله. عفا الله عما سلف عاردوا الفلوس.. إو شتي راه ميات تخميمة أو تخميمة ولا ضربة بالمقص... السّاعة أتا ضرت الكونطرير.. ميات ضربة بالمقص ولا تخميمة وحده..
خمم أوليدي قبل ما تندم... أو بعد على الخبز أو بوطاكاز، ولا دابا تفركع، أولا تفركعت راه تريّب الديور... بوطاكاز واعرة الله يرزق السلامة.
حكا كاليك داروا نظام جديد، باش كيحدوا من حوادث السير ويحقوا السلامة الطرقية.
ناضو زيروا زادو فالضعيرة... أو الفلوس دخلت والحوادث باقه هي هي... باقي البغال فالطرق كيعثروا فالطريق.. أو عمر مسكين..
-ايه عمر... نم مطمئنا يا عمر. نحن البديل المنتظر... ايه كنا صغار، نردد هذا الشعار فالمقر ... وأنا باقي صغير كنشوف تصويرة المهدي معلقة أو كرينة ...أو عمر، كلهم مشاو عند الله مشاو مقتولين... واحد ذاب فلاصيد أو لاخر تصفى فالشارع ولاخر مات فالكومسارية...
إو هادي هي الدنيا آسي الفقيه ع تكايس.. أو وزن شوية راه الوزن زوين، مكايخليش مولاه يزلك، يعني يعثر كيف عثرت بغلة فالعراق آسي عمر...
ماعندنا غرض أنا ع داوي واللسان ما فيه عظم.
فالحقيقة الإنسان فهاذ الدنيا خصوصا العرب وحنا المغاربة خصنا الفلوس اللي سولتيه أش خاصك. يكول ليك الفلوس، صافي الفلوس أو نعيشوا مزيان...
الفلوس ، الفلوس.
إو السي الفقيه لاش هاذ الفلوس؟
ياو كاين شي واحد إسول هذا السؤال علاش الفلوس، تا هبيل أولا مالك.
الفلوس شلا ما يدار بها...
-وغير كول لي أش غادي ديربها؟
-واتا هذا أحمق.. كيسول هذا السؤال... أش غدي تدير بها.. شلا ما يدار...
آسيدي نبني دار فين نسكن، أو نشري طوموبيلا أو ندير شي بيعة وشرية... أو الفلوس تجيب الفلوس أو نولي ملياردير. أو عاد كاين بلانات اخرين. نترشح الانتخابات. ندخل فالعقار نولي نبيني ونبيع...
شلا شلا ما يدار ديك الساعة... أو الوليدات ندخلهم المدارس الخصوصية. ونصيفطهم يقراو فمعاهد عليا... وندير ما يديروا الناس...
-أو من بعد ملي تجمع هاذ الفلوس وتولي مليادير أش غدي دير..
-الدراري يعاونوني المشاريع والبنات نزوجهم من أغنى الأغنياء... وندير علاقات ونولي الفوك الفوك... هاذا الشي كله إيدروه الفلوس...
الفلوس أوليدي كتفتح الطريق فالبحر... أو كدير الهيبة.. والشان والجاه ويلويو يخافو منك، ويضربو ليك ألف حساب أو حساب..
-زيد إلا كاين شحاجة...
أو صافي...
-صافي، تاكل وتشرب وتبني وتبيع، وتقري الدراري باش يعاونوك فالتجارة وتناسب مع اللي لاباس عليهم أو ترشح للانتخابات أو تولي عندك قيمة ويخافوا منك الناس ويضربوا ليك حساب...
-أو علاه لاش عايش الإنسان؟
-مسكين هاذ الإنسان.. إلا كانت هذي هي عقليتو سواء كان فقير أولا غني... مسكين محدود بزاف. لافرق بينو أو بين الحيوان... الماكل والشراب والحماية والقوة...
-بهاذ الفلوس ما فكرتيش تسافر
ما يخس شاي...
-مولاي يعقوب، سيدي حرازم... أو شي حجة أو عمرة لعلك ترضى... أهي حجة أو زيارة.. الحج فيه ما يدار...
إو الصلاة كتصلي...
-مرة مرة كنصلي أو نقطع..
اكيد الحج ما فاهم فيه تا زفته...
-واتا لتمة ويحن الله، علاه اللي مشاو ليه كاع معلمين...
-زيد
-أو صافي
-فرنسا ما غتمشيش ليها...
آش نحدر بها .. مالي فرانساوي...
زعمة تا لاباس عليك.. سير زور متحف اللوفر، أولا نهر السين.. أولا الحي اللاتيني.. أو شوف المتاحف والمعارض والمكتبات. والحضارة بصفة عامة..
-الحضارة. والليفر والصين...
لالا اللوفر ونهر السين.. مشي الليفر والصين..
-ما عمري سمعت بهاذ شي...
-أولا ولادك أش غدي تعلمهم.. أو تا ما تعرف تصلي ولا تحج باش غدين ينفعوك..؟
-راه المدارس تعلمهم... لاش حنا خاسرين الفلوس...
-كلشي بالفلوس أسي محمد !
-كلشي بالفلوس. علاه هادوك اللي الفوك كاع قارين أو مثقفين...
-عندك الحق. الأغلبية ما قارياش، إو أش كال فيها الله
-كال فيها الله..
أوبانت ليك البلاد متقدمة، غادا القدام. أولا راجعة اللور حينت هادوك لاباس عليهم فجيوبهم أو بروليتارين فريوسهم..
-أش هاد البوليتارين شي دوا.
إيه دوا ديال المخ.