سلسلة شكون هو المجرم : الحلقة الثانية.

حل الحلقة الأولى:
غوت لانسبيكتور فوجه الخدامة واتهمها بالبلاغ الكاذب والسرقة وخيانة الامانة .واعترفات الخدامة وطلعت الذهب المسروق للي خباتو
لانسبيكتور عرف سر هاذ السرقة لانه لقا البيبان ديال الفيلا مامهرسينش والجاج ديال الشرجم طاح للبرا ولو كان المخار هو للي هرس الجاج غايطيه للداخل ديال الفيلا.
الحلقة الثانية.
الفقيه بوعافية معروف فنواحي الرماني بضرب الخط الزناتي وسحر الدمياطي.كايزورو كل يوم عشرات من أصحاب الفلوس والموظفين لكبار.واحد الليلة لقاوه طايح على الارض وراسو مثقوب بقرطاسة.وحداه كبوط لونو ازرق سماوي فيه صف ديال الصدايف مذهبين وفاليد ديال الفقيه المغدور بقات واحد الصدفة محيدة من الكبوط ...لاجودان ديال الجدارمية لاحظ بلي الصدفة للي بقات فيد الفقيه خلات ثقبة وخوية فالجهة اليسرية للي فيها الصدايف دلكبوط وبان للاجودان بلي الفقيه المقتول كان كايدافع على راسو وبلي القتال من بعد ما قتل الفقيه قلب فالبيوت ديال الدار كلها على شي حاجة ولكن واش لقا داكشي للي كايقلب عليه؟واش ممكن اكون داكشي؟
الجريمة مشبكة ومعقدة على حقاش بزاف ديال الناس المكلخين للي كايزورو هاذ الشواف ولكن لاجودان مع الجدارمية لخرين توصلو لشي حقائق:
فديك لعشية للي لقاو فيه الشواف مقتول كانو ثلاثة ديال الناس عندعوهم موعد معاه
فالستة ونص جاتو الزوهرة مرات البرلماني الطاشرون المعروفة فالقبيلة وعرف لاجودان بلي جات عند الشواف باش تتكلم معاه على سر شخصي خطير خباتو على راجلها البرلماني للي كايغير عليها بزاف ولكن الشواف بوعافية عيط على راجلها وفضح السر و شد فالمقابل ملاين صحيحة.
فالثمانية ونص عندو موعد مع المحامي بنعلال المعروف فهيئة الرباط بلأستقامة والدفاع على الحق باش يتفاهم معاه على واحد الحادثة سرية كان الفقيه بوعافية عارفها و كايهدد المحامي بالفضيحة الى ما عطاه الفلوس.
فالتسعود ونص عندو موعد مع التاجر بلكبير للي خسر كل مكايملك من الفلوس فواحد لافير خاوية كان الفقيه بوعافية السبب ديالو فالخسارة .
ومن خلال التحقيق عرف لاجودان بلي الفقيه بوعافية كان باقي فالحياة حتى الستة ونص ديال العشية.
وفالتحقيق نكرات الزوهرة والمحامي بنعلال و التاجر بلكبير وجود اي علاقة ليهم فالموت ديال الفقيه .
واكتشف لاجودان بلي واحد الورقة كاتهم المحامي بنعلال تسرقات من دار الفقيه بوعافية.
حط لاجودان الأدلة قدامو واعطى الامر للشاف المساعد باش يطلق سراح جوج من المتهمين وايدير المينوط لواحد مشتبه
شكون فنظرك للي شك فيه لاجودان؟ وعلاش؟