بوغطاط المغربي: علي المرابط كيستغل الزعيترات باش يدق على المخزن ورجع للسعاية تاني بعد أزيد من 20 سنة

تحية بوغطاطية للجميع،
جا يكحلها عماها. صراحة مالقيتش شي مثلة مغربية حسن من هادي لي نعلق بها على واحد "التويت" دارو الصوحافي المُبجّل علي المرابط على قضية أبو زعيتر.
قالك واحد الميقيل (تصغير مقال) نشرو على الإخوة زعيتر فموقع Middle East Eye هو السبب باش أبو زعيتر سد الحساب ديالو على "أنستغرام". امممم.. ربي ربي واش من نيتك؟؟ هههههه
المهم، بغض النظر على ديك الهضرة ديال كاين شي جهة فالمخزن ماحملاش الزعيترات وداكشي، المرابط قال حرفيا فالتويت ديالو بأن المقال ديالو، دار لي مقدرش المخزن يديرو بكاع الحملات الإعلامية الضخمة ديالو ضد الزعيترات. هههههه تا واش شفتو على الدقان كيف داير ولا؟؟؟
أااايييه الدقااان وبالعلالي. السيد راه واخا طاير ليه الفريخ ومن شحااال هادي ولكن راه الكلام ديالو عارف فين غادي ولمن موجه وعلاش.
بالعربية تاعرابت، المرابط كان باغي يقول لشي جهة (لي توحشها وتوحش البركة ديالها): "أنا راني موجود. غير دخلو عندي. شفتو علاياش قاد؟؟ مقال واحد طيح ليكم الزعيترات. واخا مات ليا الحوت ولكن باقا شي فيا شي بركة لا بغيتو تخدمو بها فهادشي ديال الزعيترات. عافاكم لاما شوفو كيف ديرو، راه واخا خرجت من عندكم مسخوط ولكن طامع فشعار إن الوطن غفور رحيم، غير دخلو لعندي وما يكون غير الخير". هههههه
تا أش كتقول أ بوغطاط ؟؟
أااايييه كيف سمعتي. راه واخا علي المرابط طاير ليه الفريخ وحاااااس براسو بزااايد، لدرجة شي نهار يقدر يطرطق غير بالغرور والعنطزة الزايدة لي فيه، ورغم هادشي كااامل، فهو مكانش داوي خاوي وطبعا قلييييل لي غادي يفهم علاش قلت هاد الهضرة.
علاش بالسلامة أ بوغطاط؟؟
الجواب بالتفاصيل غادي تلقاوه فواحد جوج مقالات كنت كشفت فيهم الماضي والتاريخ ديال علي المرابط مع الصحافة. كيفاش دخل ليها؟ معامن؟ ومن عند من كان كياخذ لفلوس؟ وشكون فتح ليه أول جريدة؟ وعلاش تقلب على صحابو لقدام؟ وزيد وزيد... غادي تلقاو روابط المقالين لتحت:
بوغطاط المغربي يكشف علاقة علي لمرابط بالقصر الملكي وكيفاش كان كياخذ من عندهم فلوس صحيحة؟
بوغطاط المغربي | علي لمرابط: "المخزن حرام ولكن فلوسو حلال"
ولكن باختصار، هاد الهضرة لي قالها المرابط بخصوص الزعيترات (ولي طبعا لا علاقة لها بالواقع و خاص يكون ضارب شيطريفة نييييت باش يقول ديك الهضرة)، هاد الهضرة فكراتي فواحد الموقف كانو دارو المرابط مع صحابو لي كان معاهم ف لوجورنال. بحيث نهار خرج من عندهم ودار المجلة الأسبوعية ديالو Demain magazine، أول ما بدا به هو كان كيكتب مقالات تشهيرية ضدهم وكيضرب فيهم، وعلى رأسهم بوبكر الجامعي لي كان كيسميه ب "بوبكي" وكان كينشر أسرارهم.
وفاش كتعرف بأنه أصلا لفلوس باش المرابط فتح ديك المجلة ديالو هي فلوس المخزن، بحيث المؤسسين وموالين الشكارة ديال الشركة الناشرة لديك المجلة، كانو رجال أعمال من المحيط ديال القصر الملكي، فاش كتعرف هادشي كتفهم أن المرابط كان باغي يلعب لعبة خااايبة. السيد كان باغي يكسب ود المخزن على ظهر صحابو لقدام، فالوقت لي كانت أصلا لوجورنال دخلات فتوترات مع بعض الجهات. المرابط فديك لوقيتة كان بحال هاداك لي باغي يصيد فالماء العكر. ولكن لقا قدامو دوك رجال الأعمال، رجال د بصح لي عاقو به بلي ماصافيش وبلي مخلوض وقالو ليه الباب الحباب.
ولكن المرابط بعد مرور هاد السنوات كوووولها، قال مع راسو أرا نعاود نجرب، علاش لا؟؟
قال مع راسو: ياك كيقولو ماحاملينش الزعيترات؟؟ إيوا هادي وجيبة ناضية نطرق بها شي مسمار مع صحاب الحال، عل وعسى هاد السنوات لي بقات ليا من مور ما دخلت فمرحلة التقاعد، نسوڭر فيها أموري معاهم.
هههههه ولكن أبا عليلو، كيف تيقولو خوتنا المصريين: "عشم إبليس في الجنة".... بالعربية تاعرابت، فييييق من الڭلبة أ بابا فييييق، راه ما كنتي لا السباب ف سدان لحساب ديال الزعتور ولا عمرك تحلم بشي شكيكيرة من عند صحاب لحال، بحال هاديك لي كاتاخذ من عند هادوك لي من هوك... ولو أنه عارفين بلي كيخلصوك غييير بالكموسة ههههههه