خاص والي كازا يتحاسب على اللي واقع فمركب محمد الخامس. واش ماتش الراجا ضد الاهلي يتلعب فهاد لفضيحة

مركب محمد الخامس فالدار البيضاء عايش فوضى ما عمرها كانت. فوضى كتحملها السلطات المحلية. ولاية الدار البيضاء والجهات المكلفة بتدبير الكورة فهاد لمدينة.
كانت مشاكل فبيع التذاكر. خرجات ولاية الدار البيضاء الكبرى ببيان باش تتغلب على المشاكل. دابا فهاد اللحظة نقزو الاف من الجمهور ودخلو للتيران. ما تسوقو لحد.
هاد الفوضى تقدر تسالي بشي فاجعة فهاد المركب. كيفاش الجمهور وصل ودخل ونقز وتجاوز كلشي ماشي ساهلة.
دابا هاد الشي اللي وقع كلشي وموثق فالفيديو. فهاد الجو الخايب واش غادي يؤثر على الماتش واش غادي يتلعب اياب ربع الشامبيانز ليك الافريقي بين الاهلي المصري والرجاء. راه شي وحدين دخلو حتى للتيران. يعني ولات فوضى كبيرة.
دابا المسؤولية الاولى للولاية وطبعا بلا ما نهدرو على مسؤولية "كازا ايڤنت" اللي مكلفة بالتظاهرات الرياضية. هاد الوكالة حتى هي غادية تخلص وغادي يخلص مديرها محمد لجواهري اللي واقع اليوم.
هاد الاخطاء شكون غادي يخلصها وما عندها لا يد لا رجل؟ هي الرجاء. ممكن يعاقبوها بسباب تصرفات هاد الفوضى اللي مسؤول عليها بالاساس والي الدار البيضاء.