ملخص اللقاء.. أخنوش وجه رسائل من كازا للخصوم ديالو: حنا حكومة ماكنتشكاوش من "العفاريت" ومكنتخباوش من ورا المشاكل

وجه عزيز أخنوش مجموعة من الرسائل للخصوم السياسيين ديالو، وقال بأن الحكومة اللي كيترأسها مكتشكاش من "العفاريت"، فرسالة واضحة لعبد الاله ابن كيران، اللي كان وهو رئيس حكومة كيتشكى دائما من "العفاريت" والتماسيح".
أخنوش وهو كيتكلم اليوم السبت فلقاء لمنتخبي الحزب ديالو بالدار البيضاء، قال كذلك أن حزب "التجمع الوطني للأحرار" للي كيترأسو مكتيخباش من وراء الإشكاليات ولكن كيواجهها بكل مسؤولية.
رئيس حزب "التجمع الوطني للأحرار" اللي كيترأس كذلك الحكومة، خصص الجزء الأكبر من الكلمة ديالو للحديث عن الدار البيضاء، وقال أنه كان فرمضان كيخرج يدور فيها، ولمس مجموعة من المتغيرات الإيجابية، وخاصة على مستوى المساحات الخضراء.
وقال بأن هاد المتغيرات الإيجابية مجرد بداية، وخص المنتخبين ديال الحزب رفقة الأغلبية تشجعهم باش يخدمو بسرعة أكبر، والناس تشوف التغيير.
أخنوش عبر كذلك على السعادة ديالو بالمنجزات اللي حققوها المنتخبين ديال الحزب ديالو فالدار البيضاء، وقال بأن "كتافو سخان" بالعمل اللي كيقوم به المنتخبون التجمعيون مع المواطنين.
واسترسل في معرض كلمته: ".. أنا جد سعيد لأن منتخبي الحزب لديهم مؤهلات كبيرة ويحسون بالمسؤولية الملقاة على عاتقهم، ويعرفون أولويات المواطنين وحاجياتهم"، وعبر على استعدادو باش يجلس مع منتخبي الدار البيضاء بصفتو رئيس للحكومة رفقة وزير الداخلية باش يلقاو حلول للإشكالات المطروحة داخل المدينة.
أخنوش خاطب كذلك منتخبي الحزب ديالو ودعاهم باش يبتاكرو بعض السياسيات الجديد، وأكد على أن الحكومة اللي كيترأسها كتشتاغل على الانتقال الجيلي، وتشتغل على انتقالات كبرى، على غرار الانتقال الرقمي، والانتقال على مستوى الدولة الاجتماعية، حتى لا يواجه أبناؤنا في المستقبل مشاكل الصحة والتعليم، إضافة إلى التشغيل والاستدامة.