كلشي نتاقد معركة الطباسل فالاستقلال ونسى وحيد زمانه فالسياسة عيوش. وجودو ادانة ماشي للسياسيين ولكن للدولة ومؤشر على ان الديموقراطية "سير ضيم". شوفو كيفاش ربح الياس وبنكيران وشكر ابن عرفة واثنى على اخنوش ونزار

معركة الطباسل فعشا افتتاح المؤتمر 17 لحزب الاستقلال الجمعة الفايتة غطى على الاحداث. فغلاف مجلة "تيل كيل" كان مؤشر اخطر على الرغبة في قتل السياسة. جهات تصر وتصر وتصر كي تقتل السياسة. فهاد الغلاف كان وحيد زمانه نور الدين عيوش مول الاشهار والبيزنس وباش كتخرف لهاد البيزنس كيخرج بشي تخربيقة.
هاد السيد جا كيكذب على لمغاربة وكيقول ليهم راه المبادرة اللي دارها مع صحابو كمال لحبيب وادريس موساوي وعلي عبابو ما كالها ليهم حد. هادي ندوزوها. ولكن تدخل يا السي عيوش وتلاقى المعتقلين فحراك الريف فالحبس والتحقيق مازال قايم يستحيل يديرها اي حد. حتى وكيل عام او قاضي تحقيق ما يسمح بها فدولة فيها شوية احترام العدالة. المحامون وحلو يتلاقاو مع موكليهم بشكل عادي وانت وصحابك قلتي دوزتي جوج سوايع ونصف تقريبا مع مجموعة وجوج سوايع مع مجموعة اخرى. دابا عندك ساروت الحبس والعائلات كيضربو كيلومترات طويلة من الحسيمة لكازا باش يشوفو اولادهم قل من المدة اللي سمحو ليك تشوفهم.
ظهور عيوش فهاد الملف غير محاولة منو يرجع للضو يرجعو يهضرو عليه. كيفاش الاحزاب السياسية ما خلاوهاش تقرب لهاد الملف ويديرو الزرابي للسي عيوش. حشومة وعيب
عيوش ما بقاش فحوارو مع "تيل كيل" غير عند هاد الحد. السيد هاجم السياسيين وقال باللي "كيديرو السياسة ديال جوج دريال عوض الاهتمام بمشاكل المواطنين وينزلو للشارع ويسمعو للمواطنين" .
واحد بدون شرعية لا شعبية لا غيرها وعطاوه لملايير وثاقو فيه ف2007 ودار "2007 دابا" والنتيجة كلشي يعرفها. ما حاسبو حد ومازال ما بغاش يحشم ومخرج عينيه اليوم.
طبعا هاد السيد كل مرة كيكرر باللي كيتكلم كيف كيفكر ولكن غير كذوب. باش تعرفو على من يدافع تعرفو شكون قال ليه حل فمك وخرج وهدر.
قال للمغاربة ثقوا باخنوش ونزار بركة والعثماني او ابن عرفة حزبه. في المقابل هاجم عبد الاله بنكيران وقال باللي مادار والو فالريف وانه يتحمل جزءا من مسؤولية فشله في تشكيل حكومته.
بعد ما شكر الياس العماري واعتبره حيوان سياسي قال باللي خاص اللي يكوتشيه ويعلمو كيفاش يتم تدبير حزب سياسي. هاد السيد اللي اتصل بمديرة نشر "تيل كيل" عائشة اقلعي فعز الحملة الانتخابية ل2015 وطلب منها دعم البام اللي كان فيه الياس وخدم معاه. دابا كينتاقد. وما نساش مزوار الفعفاع وقال عليه باللي ما نجحش فالمهمة الللي عطاوها ليه. شوفو كيفاش كيشوف الديموقراطية. ماشي كيعطيها ليك المناضلين بل جهات كتختار اللي يطلع واللي ينزل
نرجعو للي مدحهم. هاد عيوش اعتبر العثماني "من احسن رؤساء الحكومات عندنا" وقال باللي الناس كيحاكموه حقاش ما كيديرش لكلون. يعني كيسب بنكيران بالفن وصافي. ودافع على نزار وقال باللي ايلى الديموقراطية رجعات شباط غير "خليها عندكم" وباللي اخنوش كيخدم بذكاء وفعالية ومولاي حفيظ العلمي كيدير خدمة مزيانة