بودريقة سالا مع السيبة فالرجاء.. فأول اجتماع له مع اللاعبين غسل ودنين بكلام قاصح بسبب مستواهم اللي ما كيشرفش الفريق

وجه محمد بودريقة الرئيس الجديد لنادي الرجاء الرياضي كلام قاصح للاعبي الفريق فأول لقاء لهم معه، واللي كان اليوم الاثنين فلاكاديمي ديال الخضرا فبوسكورة، وبين لهم أنه ناوي يسالي مع السيبة اللي كانت فالفريق خلال مرحلة الرئيس المستقيل عزيز البدراوي.
وخلال اجتماع بينو وبين اللاعبين وجه لهم محمد بودريقة هضرة قاصحة وقاليهم: "أول حاجة غندويو عليها، وهي المهمة، الانضباط ثم الانضباط ثم الانضباط.. كنا دايرين نتلاقاو مع الخمسة وكاينين غيابات وكاين اللي معطل وهاد الشي ما غاديش نسمحو به مستقبلا وما غنبغيوهش يكون".
وكمل بودريقة وقال: "بعدا المرة اللي فاتت فالعشاء عند السي الهواري درتو شي حوايج وشي ممارسات ما خصكمش ديروها كلاعبين راكم كتحملو قميص الرجاء الرياضي وانتم فنادي كبير راه خاصكم تكونو فمستوى الرجاء والترتيب والنتائج ديالكم فالبطولة ما كيشرفناش لا حنا ولا نتما، إذا كنتم انتما راضيين على ريوسكم تكونو فهاديك المرتبة هذا الشي كيخصكم انتم ولكن حنا كنادي هذا الشي لا يشرفنا".
وقال رئيس الرجاء: "المسؤولية دابا عليا أنا كرئيس للرجاء والنادي بجميع مكوناتو جمهور ومنخرطين كيبغيو يشوفو الرجاء ديما الفوق، وكنتمنى ديرو مجهودات كبيرة والماتشات اللي بقاو راه ماشي باش نتلاهاو وراه مامسموحش لينا نخسرو فشي مباراة، واااديرو اللي عليكم، وراه لاديسيبلين ثم لا ديسيبلين".
وأكد محمد بودريقة: "هادشي ديال كروب مع كروب ما خاصوش يبقى وما خاصوش يكون ونتمنى نبداو صفحة جديدة، داكشي اللي علينا حنا غنديوه ديال ليبريم وليطرونش راه عارفينو، ولكن داكشي اللي عليكم انتم خاصكم ديروه أي حاجة يطلبها منكم المدرب ديروها وهو المسؤول".