وهبي للجماني: قرار طردك من البام خديناه بالإجماع ويلا مابغيتي تلتزم شوف شي حزب آخر ويلا بغيتو نفتحو الملفات معنديش مشكل

قال عبد اللطيف وهبي، الأمين العام لحزب الأصالة والمعاصرة، القرارات التأديبية اللي خداها المكتب السياسي بخصوص طرد محمد سالم الجماني، تخدات بالإجماع.
وأضاف وهبي في كلمته داخل المجلس الوطني للحزب، بلي قضية الجماني طرحات هادي عام ونص وكنا كنعيطو ليه فالمكتب السياسي ومكيجاوبش، موضحا: "استقبلت بنتو لي هي عضو المكتب السياسي 4 د المرات وبلغتها بالموضوع وهي قالت بلي خصو يجي ولكن لا يرد".
وأضاف وهبي بالقول: "خذينا قرار وجات رئيسة المجلس الوطني وأخرناه 6 شهور ولكن مكيردش ومكيجاوبش"، مشيرا بلي خدينا قرار فالفريق البرلماني باش ينفذوه وكيرفض.
وتابع وهبي:"لن أتساهل مع من لا ينفذ القرار الحزبي يكون من يكون"، مشددا بلي: "سي الجماني يحترم الالتزامات تجاه الحزب ويلا مبغاش يمشي لشي حزب اخر".
وأكد وهبي بلي مبغاش يدخل فأمور اخرى كتعلق بالانتخابات ويلا خسر 7 ملايير شغلو هذاك، مضيفا :"بلي الجماني دار لائحة ديالو ولم نتدخل، وكانت عندو مواجهة عنيفة فالانتخابات فالدائرة ديالو وقال عطيني بغيتو ندخل التفاصيل انا مكنبغيش".
وأفاد وهبي بلي 31 عضو فالمكتب السياسي هوما لي صوتو على قرار طرد الجماني، مضيفا: "واش هاد 31 فيهم شي خلل كلهم؟..خليو الموضوع بارد حسن ويلا بغيتو نفتحو الملفات معندناش مشكل واحتراما للرجل وقفنا في حدود معينو".
وقال وهبي بلي:"جميع المغاربة ساهموا في القضية الوطنية ولا يمكن لأي كان أن يختزل القضية الوطنية في ذاته، وأي مواطن تقوليه سير للصحراء تقاوم غايخذ طريق. نتعامل بسواسية مع القضية الوطنية، لا توجد فيها مزايدات.