الشوباني معندوش علاش يحشم .. قال ان الصحافة كتدير ليه التشهير بسبب الأبحاث التمهيدية اللّي دايراها معاه الفرقة الوطنية حول اختلالات مالية فمجلس جهة درعة تافيلالت! وعلاش مني كنا كنعيطو ليك مابغيتيش تجاوب؟

omarelmouzaine@gmail.com
الحبيب الشوباني، رئيس مجلس جهة درعة تافيلات، المنتمي لحزب العدالة والتنمية، معندوش كاع علاش يشحم. هادي أيام سمعات ليه الفرقة الجهوية للشرطة القضائية المكلفة بجرائم المالية بفاس بسبب اختلالات مالية وإدارية بمجلس الجهة الذي يوجد على رأسه.
"كود" كان عندها السبق فالخبر ومابغيناش نشروه لأكثر من 3 أيام لسبب عندو علاقة بأخلاقيات المهنة. حنا عارفين بأنه كاين حسابات سياسية وعمرنا غادي نكون طرف أو بوق ديال شي حد كيفما كان لونه لكن خبر مثول الشوباني أمام الفرقة الأمنية المذكورة بتعليمات من الوكيل العام بفاس كان صحيح وعندنا التفاصيل كولها.
نرجعو علاش مابغيناش نكتبو الخبر في حينه وانتظرنا حتى دازت 3 أيام. السبب الوحيد هو بقينا كنساينو سيدهوم الشوباني يجاوبنا فالهاتف. "كود" عيطات ليه اكثر من 10 مرات. وماشي غير هادشي صيفطنا ليه ميساج فالواتساب وقراه باش ناخدو وجهة نظرو على التحقيق الجاري معه لكن رفض يجاوب. هنا الشوباني خربقها.
علاش يا السي الشوباني مقدتيش تعطي هاد التوضيحات قبل ؟ علاش سكتي؟. راه سكوتك كيبين بأن شي حاجة تما ماشي هي هاديك. كان خاص تكون عندو الجرأة وتخرج تقول التوضيحات ديالك ماشي تصدرها حتى خرجات "كود" الموضوع.
الشوباني خرج اليوم بشي توضحيات غبية قاليك الشكاية الموضوعة ضده "كيدية" تقدم بها بعض أعضاء المعارضة بمجلس الجهة. حنا ماشي شغلنا تكون كيدية أو ماشي كيدية. المهم أن الشوباني رجل سياسي وقيادي بارز ف"البي جي دي" مَثُل أمام ضباط الشرطة القضائية. وبالنسبة لنا هذا راه خبر وأي وواحد رجل سياسة مشا للقضاء اكتبنا عليه ماشي غير البي جي دجي. راه كتبنا على الأحرار والحركة الشعبية والبام والاستقلال وكولشي. ملفات جرائم المالية دفاس تقريبا "كود" دارت ليها التغطية كولها بدون استثناء وبلا خلفية.
توضيح الشبواني قاليك أن كل ما نشر عليه "فيه كثير من الاختلاق المتعمد والخلط المقصود"، كما أنها تعمد الصحافة قاليك استعمال قاموس يستهدف التشهير والقذف والمس بالشرف، الشيء الذي يؤكد أن تلك الشكاية الكيدية ذات لبوس سياسي وتشكل مادة موجهة للإستثمار الإعلامي السياسوي في مناخ التحضير للانتخابات الذي دخلته بلادنا والذي يتوافق زمنيا مع بداية العد العكسي لنهاية الولاية الانتدابية لمجلس الجهة. ردّك يا الشوباني مخربق والإعلام كيدير خدمتو. انهار متبغي حد يكتب عليه سالي من السياسة.
وزاد أن أحد أعضاء المعارضة من صناع الشكاية اللّي قالك أنها "كيدية" ضُبط في شهر مارس 2020 (بعد تقديم الشكاية ببضعة أشهر) متلبسا بجريمة الرشوة ، بعد لجوء أحد المستثمرين للرقم الأخضر للتبليغ عن ابتزازه له، بصفته يشغل أيضا منصب رئيس جماعة قروية، وقد قضى بسبب ذلك عقوبة حبسية انتهت مدتها قبل حوالي أسبوعين.
كما أشار إلى أن عضوا آخر من مقدمي الشكاية كان يسعى لنيل خدمة بيع حافلات النقل المدرسي بثمن مرتفع، لولا أن يقظة مكتب المجلس مكنت من اعتماد المقاربة القانونية التي جعلت المجلس يحصل على أفضل عرض تشهد على خدماته الجيدة جميع الجماعات الترابية بالجهة.
ويا السي الشوباني علاش هادشي مقديتيش تقولو انهار كانت "كود" كتعيط ليك. عدم ردّك على مكالماتنا الهاتفية المتكررة يؤكد بأن شي حاجة تما ماشي هي هاديك.
وأكد أنه منذ بداية حياته المهنية سنة 1985، وبعد 17 سنة من التدريس، و10 سنوات من عضوية البرلمان، و 3 سنوات من عضوية الحكومة، و 5 سنوات من رئاسة الجهة، فإن " كل ثروته العقارية " هي بيت مساحته 150 مترا مربعا في حي شعبي بتمارة ( ما زل يدفع اقساطه الشهرية منذ 2008 إلى اليوم).
وقاليك الشوباني "لا توجد لديه ولا لدى أصوله أو فروعه عقارات أو أرصدة بنكية لا داخل الوطن ولا خارجه، وأن كل رأسماله هو شرفي ومساهماتي المتنوعة لخدمة وطنه في مختلف مواقع المسؤولية التي تشرف بتحملها في مسار مهني وسياسي يمتد على طول 35 سنة من البذل والعطاء".