استراليا القارة اللي ما كتشبه بلاصة فالعالم. ناسها ضريفين بزاف وحامية راسها حتى من التراب. الاسود لاعبين فالتيران المستطيل للي حدا اشهر تيرانات التنس فالعالم وفمدينة ما عندهاش مع الكورة ديالنا عندهم كورتهم اكثر اثارة. البوم دالتصاور

سبور مصطفى الشاذلي ميلبورن ///
تسخسيخة كبيرة باش توصل لاستراليا وبالضبط لميلبورن العاصمة الاقتصادية لاستراليا اللي غادي يلعب فيها منتخب المغرب للانات ماتش تاريخي نهار الاثنين 24 يوليوز 2023. تاريخي كاول منتخب من عريبان واخا حنا لا علاقة لينا بيهم ولاول مرة منتخب مغربي غيلعب ماتش فالمونديال ديال لعيالات. التسافيرة ما كاين غير 13 ساعة ايلي كنتي جاي من دبي زيد عليها 7 سوايع ديال كازا دبي او كثر. على حساب منين قطعتي ومنين بديتي رحلتك
التسخسيخة كاينة فالمطار. تقريبا ساعة ونص حتى لجوج سوايع باش تخرج. تسالي مع البوليس واللي ضريفين بزاف ايلى كلشي عندك مزيان٬ تبدا الديوانة. فهاد الصباح٬ كانت البوليسية ديال الحدود بزاف على الظرافة. كان همها قبل ما يبدا مونديال لعيالات فاستراليا ونيوزلندا٬ هو ان بلادها تربح الكاس. سولات على الكورة فقط لا غير. لا فيزا. لا وراق لا والو. كلشي عندهم.
من بعد كيجي ما يعادل الديوانة عندنا. هادو واضحين بزاف. قبل ما توصل للمطار٬ شركات الطيران كتفرق ورقة فيها امور خاصك تجاوب عليها. اللي ما كيتساهلوش معاه هو دخل البذور او الفواكه او الخضر او شي حاجة خضرا. حتى ايلى سباطك فيه التراب خاصك تقولها ولا حصلوك ممكن يلغيو ليك الڤيزا. كيسولوك واش جاي من افريقيا ولكن كيفرقو بين افريقيا جنوب الصحرا وبين افريقيا شمال الصحرا. مع المغرب الامور عادية ما كيعكسوش فيها. حاسيبنا مع اوربا واخا حنا فافريقيا.
هاد الورقة خاصك ما تخبي والو. الدوا ما كيسولوش فيه. ما كيقربوش ليه. الدوا للاستعمال الشخصي.
اللي كيعطل فهاد الشي ماشي المراقبة ولكن الصف الطويل. فالمراقبة كدوز بشكل عادي. طبيعي دولة قارة كتخاف من دخول ڤيروسات او نباتات تخرج عليهم. معروفة هاد الدولة بهاد الصرامة.
باش كتفوت الديوانة وكتخرج كتزيد تكتاشف شعب زوين. مؤدب ضريف. مستعد يساعدك ويقدم ليك المعلومة ويوريك كلشي. يعطيك النصائح بلا جشع. تفادى غير صحاب الطاكسيات اللي كيكونو ماليها مهاجرين. هادوك كيصيدو الغريب وكيضربوه للنيف. رحلة ما كطلبش كثر من 30 دولار من المطار لجنوب ميبلورن٬ يطلب ليك اكثر من 80 دولار استرالي. هاد الدولار تقريبا قيمتو من قيمة الدولار الامريكي. كل دولار استرالي قيمتو 0.67 دولار امريكي فبلاد كيتخلصو ناسها 773 دولار =ديالهم= فالسيمانا على 37 ساعة دالخدمة.
طبعا كاين النقل العمومي بخدمات مزيانة. الجو عندهم بارد. ماشي برودية اوربا. فالنهار ما بين 14 و15 درجة وفالليل 9 حتى 10 درجة. لا علاقة لهاد الشي بشتا اوربا القاصح.
هنا تلقى ناس كيدورو بحوايج خفاف ف »سوت گايت » بجنوب ميبلورن وبالضبط ف »سوت بانك » على نهر « يارا ». كاينة حيوية مختالفة بزاف على سونتر لمدينة. تماك فسطاسيون التران لكبيرة كاين تمركز كبير لاستراليين من اصول صينية. مدينة تشاينا تاون كاينة هنا.
المنتخب المغربي لكرة القدم غادي يلعب فمدينة عشقها الاول لكرة القدم الاسترالية. لعبة كتجمع بين الريكبي وكرة القدم. كتبلعب باليد وبالرجل.
واخا كان حضور تاريخي لماتش الافتتاح فهاد المونديال بين استراليا وايرلندا فهاد الرياضة اللي كيسميوها بحال الميريكان سوكر٬ جمهورها قليل. ف »كود » شفنا ماتش فهاد الرياضة فتيران وسط ليتور لكبار ديال ميلبورن حدا « سوتيرن كروس ». كاين غير الاستراليين اللي حاضرين تقريبا٬ جايين مع وليداتهم الصغار، حتى التيران موجد لاستقبالهم. كيقدرو يبيعو ليك تذكرة عادية٬ غير عندهم تذكرة اخرى كدير 27 دولار. كتشريها باش تفرج واقف.
الماتش فيه اثارة ماشي بحال الفوت. الماتش سالى ب83 ل49 بعد 4 الاشواط كل شوط فيه 11 دقيقة. هنا كلشي خرج فرحان.
كتعرف علاش بحال الاستراليين بحال الامريكيين كيتجيهم كرة القدم مملة وبزاف.
اللبؤات ديالنا لاعبين فالتيران المستطيل اللي بعيد علي هاد التيران ديال كرة القدم الاسترالية. قريب بزاف من احد معالم المدينة وهو تيران لكريكيت.
التيران المغربي جدا فبارك كبير وفيه حديقة معروفة بزاف « جاردان بوتانيك ديال ميلبورن » لكن اللي قريب بزاف من التيران وبعيد عليه بشي 200 ميترو هو الملعب لكبير ديال التنس اللي كيكون فيه جوائز استراليا للتنس فيناير من كل عام.
التيران زوين. فماتش كندا ضد نيجيريا كان كلشي مزيان. التنظيم مقاد. الترويج لكرة القدم النسائية خدام مزيان. اللي مطوعين للمونديال كبار وصغار مؤدبين. ما كاينش ديك الاجراءات الامنية ديال مونديال الرجالة. كتحس كلشي دار باش يشجعو الاستراليين والاستراليات يجيو للتيرانات ومعاهم اولادهم.
هاد لبلاصة اللي فيها التيران المستطيل =هادا هو اسمو= كتسمى « بارك الاولمبي » فيها تيرانات وملاعب لكرة القدم الاسترالية وللتنس ورياضات اخرى. كان دار فالالعاب الاولمبية اللي كانت فسيدني 2000 اي قبل 23 عام.
حدا هاد البارك لكبير كاين متحف ڤيكتوريا بمليبورن اللي فابور الدخلة ولخلاص كيكون لشي فضاءات. دابا كاين معرض للفرنسي رونارد وللهولندي رامبرانت. حداهم كاين مسرح معروف. الرياضة والثقافة هنا شي كيدعم شي.
كلشي هنا باش يدير المنتخب المغربي لكرة القدم للعيالات مونديال تاريخي. طبعا القضية ماشي ساهلة. الماتش الاول نهار الاثنين ضد المانيا اللي ربحات جوجت المرات هاد المونديال. المغرب داخل ما عندو ما يخسر. كلشي رباح عندو. هاد الشي كافي باش يدير مونديال كيحمر لوجه. ما حققو الاسود فمونديال قطر غادي يكون محفز ليهم. شفنا كيفاش الايرلنديات هدرو علي هاد الانجاز المغربي قبل ماتشهم مع استراليا فالافتتاح. خسرو بواحد لزيرو ولكن لعبو ماتش كبير مع منتخب مرشح يربح المونديال.