وضعية صعيبة. لعابات فالمنتخب بكاو بزاف بعد ما سالى ماتش المانيا وتعطاهم نهار راحة غير باش يخرجو من ديك الوضعية. المدرب: كان خاصنا يومين باش نتجاوزو ديك لخسارة

عدد من اللعابات المنتخب المغربي لكرة القدم بكاو بزاف بعد ماتشهم ضد لالمان نهار 23 يوليوز 2023 بالملعب المستطيل فاول ماتش ليهم فمونديال استراليا نيوزلندا واللي خسروه ب6 لزيرو. باش سالى الماتش وكانو كيخرجو٬ عدد منهن عينيها مدمعات. ما قدروش حتى يتكلمو مع الصحافة.
لكن لبكا وفق ما علمته "كود" كان فالڤيستيار وباش وصلو لوطيل. كانت مشكلة كبيرة عند المدرب بيدروس رينارد وفرقتو كيفاش يتجاوزو هاد الشي.
المدرب ما هدرش علي لبكا ولكن فحوارو مع "سو فوت" قال باللي كان خاصو يومين باش يتجاوزو هزيمة لالمان. هاد الشي اثر حتى على البرنامج الاعدادي. كان من المفروض يترينيو الغد وهادا ما كان واخا المورال زيرو٬ لكن يوم 25 يوليوز كلشي اللعابات غاديات ياخدو راحة. كانت هادي هي الطريقة باش ما يخرجوش من المونديال ويبقاو حاضرات ويوجدو لماتش كوريا الجنوبية.
فعادة المنتخبات المشاركة فالمونديال ما كاينش الراحة. كل نهار تدريب. لكن فحالة المغرب كانت هاد الراحة اساسية باش يرجع ليهم المورال.
مدرب المنتخب فندوة صحافية دارها البارح السبت 29 يوليوز 2023 قال باللي ماتش لالمان نسيناه. طبعا التطبيق الحرفي لهاد لكلام غادي يبان اليوم فماتش المنتخب الثاني ضد كوريا الجنوبية فملعب كوبر باديلايدي. لكن التأثر والوضعية النفسية لشي لعابات مازال مستمرة. باش وصلو لمطار اديلايدي جايات من ميبلورن تلقاو ليهم مغربيات ومغاربة بالراية. شي لعابات بكاو باش شافو هاد المنظر. بكاء الفرحة يمكن يطلع ليهم المورال ولكن كيعطي صورة على وضعيتهم النفسية الصعيبة
موحالش شي حد لا المدرب ولا الوفد المرافق للمنتخب كان موجد لهاد الاحتمال ديال انهيار اللعابات نفسيا.
الانتصار هاد الصباح على كوريا الجنوبية بين باللي لبكا خلاوه للعابات وراهم