الجرايدي ل "كود": كنهدي الرباح لسيدنا.. هدف الفوز المغاربة كاملين ساهمو فيه وها شنو تبدل بين ألمانيا وكوريا وحنا متفائلات بالتأهل

عبرت ابتسام الجرايدي مولات هدف فوز المنتخب المغربي على كوريا الجنوبية اليوم الاحد، برسم الجولة الثانية من كاس العالم للسيدات 2023، على الفرحة ديالها واهدت الانتصار للملك محمد السادس واكدت ان المغاربة كاملين من لاعبات وطاقم تقني وجمهور ساهمو فهدف الرباح اللي ماركات، وبلي غتخدم هي اللاعبات صحابتها على تحقيق الرباح الماتش الجاي والتاهل للدور الثاني.
وتحدثت ابتسام الجرايدي فتصريح لها بعد الماتش وقالت: "إحساس زوين انك تسجلي فكاس العالم، وهذا الشي ماشي غير بوحدي ولكن جا بفضل الزميلات ديالي بالفريق وبفضل الطاقم التقني والجمهور اللي جا ساندنا ووقف معنا حتى اخر دقيقة والحمد لله ربي ما خيبناش وربحنا وخدينا 3 نقاط، وكنهدي هذا الفوز لسيدنا الله يخليه لنا، وغنبداو دابا تفكرو فالماتش الجاي باش نتأهلو".
موقع "كود" سول ابتسام الجرايدي واش كانت معولة انها تماركي من هذاك السونطراح ديال ايت الحاج، وهي جاوبت قالت: "ضروري انا داخلة للماتش باش نسجل ونهدي الفوز للمنتخب 3 النقاط"
وبخصوص الاشياء اللي تغيرت وسط المنتخب المغربي ما بين ماتش المانيا وماتش كوريا الجنوبية قالت المهاجمة المغربية: "أن الخدمة هي سر ورا هذا الرباح، وانها هي وصحاباتها فالمنتخب غيزيدو يخدمو و يوجدو مزيان للماتش الجاي ضد كولومبيا ومتفائلات بالرباح والتأهل".