فاستراليا. المشية للتيرانات نزاهة والعائلات كيديو وليداتهم مفركسين بحال نهار العيد =تصاور

فماتش المغرب ضد كوريا الجنوبية الاحد 30 يوليوز 2029 بملعب اديلايد الاسترالية عن كأس العالم للسيدات٬ كان عدد الاطفال اللي جايين مع والديهم ملفت فهاد لمدينة الساحرة.
فهاد الماتش اللي حضروه كثر من 12 الف مشجع الغالبية العظمى استراليات واستراليين٬ كانت شي عائلات جاية نزاهة. اللي عندو بنت جايبها لابسة تقريبا بحال حوايج العيد واللي عندو ولد اما لابس لباس رياضي او مأنتك باش يحضر للحدث.
المشجعين والمشجعات اللي جابو ولادهم فسرو هاد الشي ل"كود" باللي هادي مناسبة كيتاشفو رياضة كرة القدم. رياضة ما عندهاش شعبية فبلاد "كرة القدم الاسترالية" اللي ما عندها علاقة ب"سوكر"، فبلاد الروگبي ولكريكيت ورياضات اخرى اكثر شعبية.
لكن عائلة اخرى اكدات باللي هادي عادة فاستراليا. "هنا كتمشي العائلة فنهاية الاسبوع للتيرانات مجموعة. كيكونو الاطفال ولكبار. الخرجة للتيران متعة وفراجة ولحظة فرح بالمنتخب او بنادي المدينة" يشرح استرالي ل"كود".
هاد الشي شافتو "كود" فماتش "كرة القدم الاسترالية" بملعب ميبلورن بسوت بانك. كان تقريبا كل مشجع او مشجعة جايب=ة= معاه ولدو او بنتو الصغيرة.
اللي كيشجع على هاد الشي هو ان التيرانات مهيأة للاطفال. قبل ما تدخل للتيران سوا فماتشات المونديال او ف"كرة القدم الاسترالية" يمكن توصل مع بدية الماتش وتدخل بسهولة بزاف وممكن تجي قبل وتلقى انشطة عندها علاقة بهاديك الرياضة فگاع جناب التيران. يعني الخرجة بصاح نزاهة. فرحة مشتركة. قصارة.
فالتيران نفس الشيء. كلشي منظم باش تاكل ايلى جاك الجوع. بغيتي تشرب الطاسة موجودة. تشرب شي حاجة اخرى متوفرة. تمشي لطواليط نقية. تتمتع اجواء زوينة.
البارح 31 يوليوز ب"فان زون" مدينة بورت" كان ماتش استراليا ضد كندا واللي ربحوه الاستراليات ب4 لزيرو. فهاد لبلاصة كانت عامرة بزاف وكانو حتى الرضع جايبينهم والديهم وملبسينهم توني المنتخب.
طبعا كان كلشي متوفر باش يدوز هاد الجمهور وقت زوين بزاف وفظروف اكثر من رائعة. كتحس فالكورة تجسيد لاحترام المواطنة. كتخلي المواطن يرجع للتيران وكتوجد للمستقبل جمهور متشبع بثقافة التيرانات.