الدواعش فالمغرب خرجو ليها كود. خرجو فتوى لقتل لغليمي. هاد الاخير ل"كود": حياتي مهددة ونشرو تصاور ماشي دياولي ودابا حتى مول التصاور مهدد وحطو 4 مليون ونص على اللي يقدم معطيات علي وها شكون

عدد من المتابعين للفكر المتطرف فالمغرب حدرو من دواعش اخطر من هادوك اللي دارو 16 ماي 2003. اكدو باللي هيجو الناس هادي سنوات وباللي كيوجدو يدوزو للتطبيق. كاين اعتقالات لهاد الارهابيين كثيرة ولكن باقيين شي وحدين كينظرو ويحلو دم اللي معارضينهم.
هاد السيمانا خرجو دواعش بكل وقاحة كيهدرو دم لغليمي اللي فرش شيخهم العماري فالتسجيل الشهير. هاد الدواعش خرجو فغرفة ف"كلوب هاوس". قال واحد منهم ويدعى سعيد وهو من الرباط حسب مصادر "كود"٬ باللي "لغليمي باجماع فقهاء المسلمين يقتل حدا بلا باستتابة. يقتل ردة بلا استتابة".
هاد الداعشي كان معاه وفق مصادر "كود"٬ انس املاك المعروف بانس بينو اللي كان طرداتو ايطاليا بتهمة الارهاب فقضية محاولة قتل بابا الفاتيكان ودابا ساكن ففاس. هاد الشخص كان هدد لغليمي فاتصال بيناتهم وكان سب النظام الملكي وقال ليه راه "الملك اللي خلاك عايش" ولاح صور اعتقد انها للغليمي.
وكاين فهاديك الغرفة اللي هدرات دم لغليمي انس بن محمد من تطوان وشي حد اسمو عزالدين زحل عندو شي قناة اسمها "موحد مغربي" بغى يرد على كافر مغربي. شوفو الغباء كي داير وكاين شي حد ملقب راسو "تاشيف الاصغر" من اكادير وكاين شي حد عندو بسورو "اهل السنة" واسمو الحقيقي ياسين.
وفاتصال من "كود" بالغليمي قال "كنحس براسي مهدد" واضاف ل"كود" باللي نشرو صور لشخص كيقولو انو هو وباللي دابا ماشي غير هو اللي مهدد فالسلامة الجسدية ديالو بل حتى اللي نشرو صورتو.
لغليمي قال ل"كود" باللي الدواعش حطو مكافأة قيمتها 46 الف درهم لكل واحد يقدم معطيات علي فين ساكن واش من حي ولمدينة والتصاور...وباللي كاينة تسجيلات فهاد السياق.
هاد الشي كولو وصلنا ليه لان الاسلاميين الداعمين للمتطرفين رفضو يكون فالدستور المغربي ل2011 حرية المعتقد. كون كان هاد الفصل فالدستور الدواعش وفكرهم كان غادي يتقلص