البوليساريو منعات الناس تلاقا دي ميستورا... التنوع فالناس لي غادي يتلاقاهم المبعوث الأممي فالعيون كيعطي للمغرب تقدم واضح

Elouali.zaz.1987@gmail.com
زيارة المبعوث الشخصي للأمين العام للأمم المتحدة لنزاع الصحراء، ستافان دي ميستورا، لمدينة العيون حقق فيها المغرب نقاط مزيانة قبل حتى ما تبدا وقبل حتى ما يجي.
هاد الخطوات لي تقدمهم المغرب على جبهة البوليساريو والجزائر فهاد النوع ديال المعارك لي مهمة باين للعيان، بحيث ستكون لقاءات ستافان دي ميستورا متنوعة وكتشمل كل المجالات، لاسيما المجال السياسي والاقتصادي والحقوقي والثقافي والقبَلي حتى هو، وهادشي ما كانش فاش مشا للمخيمات، بحيث تلاقاوه فقط قيادات الجبهة وبعض العسكريين لي لبسو مدني وقالو ليه حنا حقوقيين.
فالعيون والداخلة المغرب كسب معركة قبل ما تبدا، بحيث كاين تنوع فاللقاءات لي غادي يدير ولي كتشمل حسب مصادر "گود" الخاصة" لقاءات مع المنتخبين الممثلين الشرعيين أبناء المنطقة الذين يديرون شؤون الجماعات والجهة، فضلا عن الفعاليات الإقتصادية لي كتستثمر فالصحرا والتي تواكب الطفرة التنموية فالجهة كلها.
بالإضافة إلى أنه كاينة لقاءات مبرمجة مع الحقوقيين ممثلي المنظمات غير الحكومية واللجنة الجهوية لحقوق الإنسان العيون الساقية الحمراء لي غادي يقدمو تصورهم لوضع حقوق الإنسان فالمنطقة كيف كيشوفوها وكيف كتبان للعيان والجهود لي كاينة باش يتم ترقية هاد القطاع لي معركتو مستمرة بين أطروحة معادية مبنية على التدليس والمغالطة وأطروحة تعمل على إرساء حقوق الإنسان واحترامها والدفاع عنها.
وفنفس السياق، اوبالإضافة للفعاليات الحقوقية والمنظمات غير الحكومية، ستافان دي ميستورا غادي يتلاقى فعاليات كتخدم فمجالات الهجرة والطفل والإعاقة والمرأة، وهادشي ما شفناهش فاش مشا لمخيمات تندوف وتلاقى قيادات البوليساريو وعسكريين نتاحلو صفات مختالفة باش ما يخليوش شي حد يخرج على أطروحتهم أو أنه يكون أي صوت معارض للبوليساريو فوقيتة كتعاني فيه سياسيا بزاف.
هاد اللقاءات وتنوعها مهم لينا وكيعطي صورة على خدمة المملكة المغربية لي شمل كل مناحي الحياة فالصحرا، وكتعطي صورة أيضا على ممارسة ساكنة المنطقة وهاد الفعاليات لحياتها الطبيعية بحرية وبأريحية، وهادشي ما غاديش يمر مرور الكرام على ستافان دي ميستورا وغادي يكون فتقريرو لي غادي يرفع للأمانة العامة للأمم المتحدة ولأعضاء مجلس الأمن قبل مناقشات مجلس الأمن الدولي حول الصحرا فأكتوبر الجاي.