شوف على وقاحة شوف ! واش كاين شي احمق كايقول هاد الهضرة فهاد الظروف ؟ كيفاش ولد البسطاوي كايشمت فالمناطق لي ضربها الزلزال و يقول بلي الزلزال كايجي بسباب الفساد ! هادي راها سبّة و معيورة للضحايا و عائلاتهم لي مالقاو تا الخبز ياكلوه بقا ليهم غا الفساد (صور)

الانسان الطبيعي و العادي فاش كايسمع بشي كارثة طبيعية ضربات بلادو او اي بلاد اخرى راه الاحساس الطبيعي لي غايجيه هوا الخوف و الحزن و التعاطف ! و بالخصوص الى كانت بلادو !
الزلزال راه كارثة انسانية قبل ماتكون كارثة طبيعية، ناس كايموتو، عائلات كايتشردو، اطفال كايبقاو بلا واليدين، بلا مانهضرو على الخسائر المادية الكبيرة بزاف ! مايمكنش تسمع خبار و تفرح واخا يكون الزلزال ضرب العدو ديالك ! هادشي كايتسمى "الشّرَف" بالفرونسي لونور ! العدو ديالك حتى فلحظة الحرب غاتبغيه يموت بالسلاح ديالك ماشي يضربو زلزال هوا ولادو !
و المغاربة معروفين بالتعاطف ديالهم و التآزر ! مافهمتش منين تسلّط علينا هاد ولد البسطاوي لي بلا حشمة بلا حيا كايشمت فالناس و كايقول بلي الزلزال ضرب فالمناطق لي فيها الفساد زايد نغزة ! و ديك الهضرة ديال الملاوي ديال ماتحركت الارض تحت قوم الا لكثرة ذنوبهم فحالا هاداك لي قالها براسو كان عالم جيولوجيا ! طز ! و السيد مشا بعيد قاليك البلاد لي شادينها الشفارة و المثليين غي تسنى عذاب الله ! نتمناو تكون عندو الشجاعة كيما كايقول و كيما كايتبجح و يقول شكون هوما هاد الشفارة و المثليين لي شادين البلاد ؟ ياك نتا خصيم و شديد وواعر ! وا قولينا ! و لا سير للمحكمة و دير شي شكاية استعجالية بهادوك الشفارة ؟! حيت الى عندك شي دليل ديال الشفرة و ساكت عليه راه كاتمارس جريمة سميتها التستر !
البلاد عندها مواليها ! المغرب عندو ولادو و بناتو ! البومبية و الاطباء و العسكر و ولاد و بنات الناس المتطوعين لي خدَامين فهاد المحنة باش يعتقو خوتهم و المرضى شنو كايشيط ليهم ؟ كايشيط ليهم الشماتة فولاد و بنات بلادهم ! الدراوش لي مالقاو تا الخبز ياكلوه بقا ليهم غي الفساد !