البيزوطاج ماكانش خصو يوصل للمدارس المغربية حيت ولا وسيلة لگاع الطلبة المقموعين باش يمارسو السادية ديالهم على الطلاب الجدد ! ماكاين لا ” ادماج” لا والو !

الظاهرة ديال البيزوطاج معروفة و كاتمارس فبزاف ديال المدارس عبر العالم و بالخصوص فالمدارس العسكرية ! و من شحال هادي و النقاش مفتوح حول هاد الظاهرة ! كان لي كايشجعها و باغيها و كاين لي ضدها ! حتى فالمغرب كاتمارس فالمدارس العسكرية و هاد التقليد خداوه مدارس المهندسين و معاهد التجارة الكبار و لي كايدخلو ليهم ولاد و بنات اغلبهم قراية من خيرة ما انتج التعليم المغربي !
كإنسانة تعرضات للبيزوطاج فاش كانت تلميذة فوحدة من اكبر المدارس فالمغرب نقدر نقول انه لحد الساعة ماعمري عرفت لاش كايصلاح داك البيزوطاج ؟ و من مورا ما نتاشر داك الفيديو ديال طالبة كايتكرفصو عليها الطالبات فمدرسة المهندسين زدت تأكدت بلي ديك الممارسة ماليها حتى معنى على الاقل فالمدارس المغربية ! علاش ؟ حيت بعيدا عن الهدف لي كايروجو ليه ديال ” ادماج الطالب” داكشي لي كايتمارس على الطالب فالبيزوطاج فاغلب المدارس المغربي (من غير المعاهد العسكرية) ماعندو تا علاقة بالادماج لا من قريب و لا من بعيد، علاش ؟
انا غانقوليك علاش حسب تجربتي الخاصة ! اولا خليونا نتافقو على انه فاش كاتكون طالب او طالبة اول مرة غاتخرج من داركم من مورا الباك و غاتسكن بوحدك و تعيش بوحدك و تتلاقى مع ناس من جنسيات و مناطق مختلفة فراه كايكون عندك ما يكفي من التحديات لي خاصهم تركيز و مورال مزيان باش تقدر تواجهم ! كاتمشي للمدرسة لي نتا ختاريتيها كاتلقاهم ملقين ليك بالما و البيض و كايمرمدو فيك فالغيس و تجي عندك شي بوالة تبدا عليك ” تحيري لينا ” ” غني الشاليني ” ” تحناي و ديري المشية ديال الفكرون ” ! آشمن ادماج هذا ؟ مع العلم انه فداك الاسبوع الاول بزاف ديال الطلبة كايكونو يا الله كايقلبو على سكن يعني ماعندهمش فين يدوشو و فين يصبنو حوايجهم لاتوسخو ! البيزوطاج دار فالدول لي مدارسها مجهزة بآلات تصبين و دوشات سخان و سائل راحة ماشي لانتيرنات ديال اغلب المدارس و الاحياء الجامعية لي تا الكوابن ماعندهم مگادين!
ثانيا بعد هاد السنوات لي دازت كاملة لقيت انه دوك لي كاي”بوزطو” عباد الله غالبا كايكونو من واحد النوعية ديال القراية المتزمتين ! الخيبوعين و الخيبوعات ! لي كاتكون عندهم غي ديك السويمينة فين يمارسو اثبات الذات ديالهم ! كاتلقا بوقال جاي من مدينتو سيمانة قبل ماتبدا القراية عوض يجلس يشبع عطلة و بحر و نعاس ! باش شنو ؟ باش ” يبوزط” ! ايوا الله يبوزط لمك الراس آ مسالي القب ! فين ماكاين شي خايب عارف راسو ماعندو تا شي فرصة يتصاحب مع شي بنت زوينة كايجي يحگر على البنات الجدادات و يمارس عليهم السادية ديالو ” عطي السلام للونصيان ديالك” ! السلام يا ولد الحرام نتا هوا الجينيرال دوگول شاركتي فلاندوشين! ماحشميتش هوكاك عنگك عوج و باغي ” السلام” ! و فاش كاتشوف كاتلقا اغلب دوك الطلبة هوما اصلا مبوزطين من عند الله مبوزطهم الزمان و الواليدين و الحزقة و الاساتذة و كايبغيو يفرگعو العقد ديالهم فطلبة اخرين ! فحال تجربة ستانفورد الشهيرة ! لي شد فيها واحد العالم جوج گروبات ديال الطلبة وحدين طلب منهم يلعبو دور المساجين و لخرين يلعبو دور الحراس و لي من بعد مدة من الزمن اكتشف انه الطلبة لي كايلعبو دور الحراس عجبهم الدور و بداو كايتفننو فتعذيب الطلبة الاخرين ، فالاخر العالم كان مضطر يحبس التجربة حيت بصح كانت غاتسالي بشي مصيبة كحلة ! الشيء لي كايبين بلي الانسان لاعطيتيه لوطوريطي و خليتيه منو لراسو بلا حسيب بلا رقيب راه يقدو يتحول لوحش ! و هادشي وقع عند بنو الأبيض ! تخايل شنو غايوقع عندنا حنا لي المخير فينا شبعان عقد و عندو جوج مخاخ !
هادشي علاش اغلب المدارس خاصها تحمي الطلبة ديالها من البلطجية و البسيكوباطات لي كايبغيو يفرگعو السادية ديالهم فعباد الله ، من كائنات فاش كايغيب عليهم الكونطرول و كايطلقو العنان لداك البسيكوباط لي عايش فيهم كايبداو يبدعو فتعنيف الآخر ! و لا بغيتو تسهلو الاندماج على الطلبة الجدد عطا الله ماديرو ليهم ! عاونوهم غا يلقاو الكرا ! طيبو شي طاجين و عيطو ليهم يتعشاو … راه اغلبهم كايكونو مقهورين بالطاكوسات!