عادل رمزي: غندخلو لتحقيق نتيجة مزيانة فدونور تسهل علينا ماتش الروتور ضد صن داونز

اكد عادل رمزي مدرب الوداد الرياضي ان الفريق غيلعب ضد صن داونز الجنوب افريقي فذهاب السوبر ليك لتحقيق نتيجة ايجابية فذهاب السوبر ليك الافديقي باش تسهل عليه ماتش الروتور اللي غيكون مختلف، وان المبارتين بجوج غيكونو مختالفين.
وتحدث عادل رمزي مدرب الوداد فالندوة الصحافية اللي كتسبق ماتش الوداد وصن داونز وقال: "ماتش الذهاب غنحاولو نديرو نتيجة ايجابية ونماركيو اكبر عدد من الاهداف، وما يتماركاوش علينا اهداف".
وكمل عادل رمزي: "كنشوف ماتش بماتش وكل مباراة والسيناريو ديالها والنتيجة ديال الذهاب كتطيك غير واحد الامتياز قبال الروتور اما ماتش الاياب خاصك تتأقلم فيه".
ووضح عادل رمزي: " الخصم اللي غنلعبو معه دابا مختلف على الخصوم اللي لعبنا معهم من قبل صن داونز كيلعبو الكورة وحتى حنا باغيين نلعبو الكورة والماتشات بجوج غيكونو مفتوحين".
وأكد عادل رمزي: "فبلادنا وقدام جمهورنا غنحاولو ما امكن نديرو نتيجة اللي تخدم مصالحنا فجنوب افريقيا وهذا الشي واعيين به، طبعا بغينا النتيجة والأداء بواقعية وهذا هدفنا".