وليد الركراكي: ها شنو قصدت ملي قلت باغي نربح كأس العالم

شرح وليد الركراكي الناخب الوطني المغربي شنو عنا بالكلام ديال ملي قال باغي يربح كأس العالم من بعدما كان المنتخب الوطني المغربي تأهل لثمن نهائي مونديال قطر 2022، وأكد بلي صحيح أن الحلم ماشي هو الحقيقة ولكن أي واحد من حقو يحلم، بلي الكلام ديالو راه ما يقدرش يوقع دابا ولكن الغرض منو هو يرسل ميساج بوزيتيف للعابا، وأن إفريقيا من حقها تحلم بكوب ديموند وإلى ما تحققش هاد الحلم دابا غادي يتحقق فالمستقبل من طرف المغرب أو السنغال أو بلد إفريقي آخر.
وقال وليد الركراكي فالندوة الصحافية اللي كتسبق ماتش المغرب وإسبانيا: "أنا ما عنيتش بلي غادي نربحو كأس العالم واخا بغينا نربحوها، اللي بغيت نعني هو أن أي حاجة تقدر توقع فالكرة، وديما كنقولها وحتى لاولادنا راه خاصك تحلم باش توصل وإلى قلتي لشي واحد ولد عامل بناء ما يقدرش يكون شي حاجة فحياتو راه عمرو ما يقدر يدير هاد الحاجة".
وكمل وليد الركراكي كلامو وقال: "حنا الأفارقة عمرنا ما ربحنا كأس إفريقيا، ولكن علاش ما نحلموش نربحوها.. هذا راه ميساج إيجابي للمستقبل وهادشي اللي كنقول للعابا، حيث حتى حنا إلى دخلنا وقلنا عمرنا ما غادي نربحو كأس العالم غادي نخسرو غدا مع إسبانيا، راه بلعكس علاش ما نديوهاش وعلاش الصحافة العربية والإفريقية ما يقولوش راه نقدرو نربحو كوب ديموند".
وأكد وليد الركراكي وعطى مثال براسو: "ها هو قدامك واحد ولد مدينة صغيرة واليوم جالس معك ولاعب ثمن نهائي كأس العالم قطر 2022، وإلى كنت حتى أنا كنفكر بلي ما نقدرش نوصل وما كنحلمش ما كنتش غادي نكون هنا اليوم، داكشي علاش كنقوليك علاش ما نربحوش حتى حنا كأس العالم وغدا غادي نتقاتلو باش نتأهلو لربع النهائي راه نقدرو ما نديوهاش ولكن غادي نكونو حلمنا بها وتقاتلنا عليها باش من بعد 20 أو 30 عام يديها منتخب إفريقيا سوا المغرب أو السنغال أو غيرهم وغادي يقولو راه المغرب كان كيقول هاد الحلم غادي يتحقق".