الناصيري: الوداد ديال المغاربة كاملين ما للبيع ما للشرا والمستثمر السعودي مرحبا به ولكن فإطار معين

أكد سعيد الناصيري رئيس الوداد الرياضي أن النادي ما كيتباع ما كيتشرا، وأن المستثمر السعودي اللي باغي يجي يستثمر فلوسو بالنادي مرحب به ولكن فإطار معين، حيث الواك نادي ديال المغاربة كاملين وحتى حد ما غيحتاكرو لا السعودي ولا الناصيري ولا غيرو.
وتحدث سعيد الناصيري على قضية المستثمر السعودي اللي قال أنه باغي يجي يستثمر فالوداد، وقال رئيس الوداد خلال المرور ديالو على "راديو مارس": "باش ما نبداوش نخلطو هذا جا يستثمر فالوداد، دابا أنا رئيس النادي اللي عندو مرجعية تاريخية وفريق المقاومة، ما يمكنش ليا نجي نفوت نادي الوداد لأي شخص باشما كانت الصلاحيات ديالي، واخا أنا هو الرئيس د الواك".
وكمل الناصيري وقال على السعودي مول الشكارة: "المستثمر مرحبا به راه تكلمت معه وبتمعن وفهمتو الإطار اللي يمكن نمشيو فيه وهو الاستثمار فاللاعبين فقط، اما الوداد فهو مؤسسة مغربية وإرت ديال المغاربة كاملين ما يمكنش نجي أنا ندخل له شي أجنبي ولا انا ولا صاحبي نجي نقوله اجي ناخذو الاسهم ديال الوداد، والقانون ما كيسمحش بهذا الشي ولو يكون يسمح القانون فالأخلاق ما كتسمحش ليا".
وشدد سعيد الناصيري: "الوداد أمانة وغتبقى حتى نعطيوها للخلف اللي يستحقها ويمشي بها للقدام، السعودي اللي بغا يجي مرحبا به ولكن فإطار معين وسليم ونبركو معه ونتفق كيفاش يساهم بشراء عقود لاعبين وكيفاش يرجع فلوسو ملي يتباع العقد، ماشي سعيد الناصيري غيفيق واحد النهار يعيط له أجي انت الله يخليك أنا غنكتب لك الوداد بسميتك، هذا الشي اللي كاين وملي نمشي انا يديروها إذا بغاو وهذه قناعتي".