رد مروان فخر الكول ديال الرجاء الرياضي اللي قرر النادي يتفارق معه، (رد) على رئيس الفريق محمد بودريقة، بعدما كشف الأخير أن الكول الثاني فالرجاء ما بغاش يصبر مع النادي وباغي مستحقاتو فالبلاصة وأن أن يلاعب تشكى أو مشى للجامعة باش ياخذ داكشي اللي كيتسال غيمشي بحالو من الفريق. ومحمد بودريقة رئيس الرجاء الرياضي داز مع باج فيسبوك "dimadimaraja"، وقال على مروان فخر: "هو آخر واحد طلع للكار فاش كان الفريق غادي السعودية كلست معه نساعة، قلت له سي مروان فخر انت الحار الثاني ديال الفريق راه المبلغ اللي كتشد 180 مليون راه بزاف، مستحيل انقبلوه راه أنس الزنيتي الكول الأول نقص وحتى انت خاصك تنقص، وعندك واحد ليطرونش غير ترجع من السعودية وجدهم لك تاخذهم ولكن مازال الطائرة ديال الرجاء غادية فالسماء لقطر وعيط ليا الوكيل ديالو، قاليا باغي فلوسو، قلت له يالاه دويت معه". وكمل بودريقة: "اليوم ملي كيدوي معك الوكيل كيقوليك هاد سي مروان فخر كيتسال 100 مليون، كنقولو له ما كاين حتى مشكل ولكن نقسموها نعطيوه 50 مليون بخمسين مليون مثلا، ملي وصل مروان فخر هو الرجاء لقطر عيط ليا الوكيل قاليا اللاعب باغي 100 مليون ديالو وبغاها دابا، وقاليا غنكتب لكم ونعطيكم 15 مليون.. واش دابا هذا لاعب نخليه فالفريق؟". الكول ديال الرجاء الرياضي مروان فخر اللي قرر المكتب المديري يفسخ معه العقد، اختار الرد على محمد بودريقة ونشر سطوري على أنستغرام ديالو قال فيه: "يا أيها الذين آمنوا إن جاءكم فاسق بنبأ فتبينوا أن تصيبوا قوما بجهالة فتصبحوا على ما فعلتم نادمين"، وزاد وكتب: "الظلم ظلمات يوم القيامة".
