السائح فاش يكون جاي لمدينة فاس خاص يدير في بالو بلي بحال الى جاي لشي سوق أسبوعي في البادية نواحي تيسة كيحلو مع الصباح ويسدو مع المغرب، وهذا هو الوضع الحقيقي للمدينة القديمة بدون مبالغة باقا تابعة للتوقيت ديال ما قبل اختراع الكهرباء

، عمري شفت مدينة سياحية أو تطمع لذلك كتسد مع المغرب بحال شي سوق اسبوعي في الرحامنة، لاش غادي يجيو هاد السياح وهوما خاصهم يتبعو التوقيت ديال الدواور وعند بالهم راه جايين لمدينة، راه القهوة وكتبقى في الدوار حتى للجوج دالليل بينما فاس وحدة من اعرق مدن العالم الى جيتي ليها سياحة خاصك مع التسعود الى عندك شي اوطيل او رياض دخل ليه لعشرة تلقاك ناعس مع الدجاج.
فاش كيسول أي واحد على شي مدينة سياحية باغي يمشي ليها، كيستقصي حول الأنشطة والمطاعم والفعاليات والساحات لي يمكن يزورها بالليل، البرنامج العادي ديال أي انسان راه كتوصل للمدينة في نص نهار كتشد اوطيل مثلا كتغدى تقدر تنعس شي نص ساعة ترتاح وكتخرج بالعشية تستكشف المدينة، هاد البرنامج غادي تبغي تديرو في فاس غتخرج غتلقى كولشي ساد، والدروبة ضيقين وخاويين وكيبقاو فيهم غير خويا الله يحن عليك مفروزين بوحدهم، بحال الى خارج لشي حي هامشي في جنب المدينة وفي الواقع نتا في اعرق مدينة في العالم.
جامع لفنا الى مشيتي ليه غي الصباح ماغادي تلقى تاحد من غير الكلاب أو شي حد كيحيد التمن فشي قهوة تم، الحياة كتبدى فيه حتى لعشية وكتستمر طوال الليل، وكذلك الأسواق المحيطة بيه ومراكش كلها عموما، ومن غير مراكش طنجة مثلا هبط في أي وقت لسوق الداخل غادي تلقاه عامر وهادشي قرون هادي ماشي غير دابا لي الامن موجود والدنيا زيانت، بينما فاس مدينة بكل مقومات تكون فيها حياة ليلية سياحية، ولكن للأسف باقي خدامين بالتوقيت ديال جمعة الگفاف، في الصيف وفي عز الحرارة ومع 12 دالليل قريبة لربعين ومع ذلك المدينة مسدودة ومكاين فين تمشي أو تدور وغير وجوه الخير خارجين مستفين في الدروبة گانها مدينة محكوم عليها بالموت ومعندها حتى شي مستقبل سياحي.