في الوقت لي تقاد نفق الحسن 2 دالرباط ف40 يوم, ففاس غير مقطع طرقي صغير كيبقاو فيه عام وكثر. مايمكنش يبقى هاد التركيز على مشاريع الرباط وكازا ولمدن لخرى باقا عايشة في التمانينات

في الوقت لي المغرب كامل يتناقل صور وفيديوات نفق الحسن التاني بحسان الرباط ومدة إنشائه لي مافايتاش شهر ونص، والناس فرحانين لهاد الرقم الغير مسبوق لإنجاز الاوراش في المغرب، كاين واحد المقطع طرقي فيه شي300 ميترو تقريبا أو كثر كيربط بين حي القرويين وعين السمن وكيخرج في لوطوروط، بداو يصلحوه كنظن في الصيف أو قبلها، هو من ديما شبعان حفاري وكيسدوه غير بالتراب في ظاهرة عمري شفتها فشي مدينة كبيرة كاينة غير في فاس، تاوجطات ومافيهاش هاد القضية ديال حفرى كبيرة وسط الشانطي كتسد بالتراب والتفنة والردم ديال البني، مكاين لا جبل غادي يحفروه لا ضاية غادي يردموها لا قنطرة غادي يدوزوها، طريق غادي يتقاد ليها طروطوار وتزفت فقط، راهم خدامين دابا باش يكملو العام عاد تكمل أو كثر على غرار كل الإصلاحات والمشاريع الجديدة في هاد المدينة، دابا يا إما هاد المقاولين والمنتخبين والمسؤولين ديال فاس ماشي مغاربة شي نوع آخر ديال المخلوقت سلاط على هاد المدينة، أو أن دوك العمال والمهندسين والمسؤولين لي شرفو على نفق الرباط ماشي مغاربة شناوا أو كوريين متنكرين في هيئة مغاربة قادو داك النفق وغادي يمشيو بحالهم.
راه مايمكنش يكون هاد الفرق كامل بين فاس والرباط وطنجة في وتيرة وسرعة إنجاز الأوراش والإصلاحات، وبحال الى هادوك ناس وشعب واحد آخر مختالف نهائيا على هذا لي هنا، نفق على قدو تحفر وتقاد في ربعين يوم وتفتحات الطريق ورجعات الأمور لمجاريها وزيانت المدينة وتخففات حركة السير، وهنا مثلا طريق ويسلان راه فايتة عام وهوما باقين كيقادو فيها، مافيها قنطرة مافيها نفق عقبة غادي تعاود تزفت، مقطع من شارع محمد الخامس هنا راه دوزو فيبه كثر من عام، بينما طنجة في عام راه كتبنى حومة على قدها في شوارعها وزناقيها وديورها وقهاويها وبانكاتها، هادي راه فاتت المغرب يمشي بسرعتين، هادي راه شي غادي مكسيري وشي واقف في بلاصتو، وفاس راجعة باللور.
الجيل ديالي في طنجة عشنا التاريخ مع جوج قنطرات دوزو سنوات وهوما كيتصلحو، القنطرة دبنديبان، والقنطرة دمغوغة لي أصلا كولشي نسى واش أنها ممكن تقاد شي نهار أصلا، شي عشر سنين ديال الإصلاح وغير تكمل يعاودوها، ولفنا بهاد الوثيرة، ولكن في السنوات الأخيرة شفنا طرقان وقناطر وأوراش ومشاريع كبيرة تدارت دغية وشفنا بلي الوقت تبدلات، ومابقاش داك الحماق ديال شحال هادي، حتى وصلنا أننا شنا نفق تدار في ربعين يوم لي وقت قياسي، ولكن للأسف هاد السرعة في إنجاز المشاريع والكفائة غير شاملة المغرب كامل، بل فقط في مدون قليلة محدودة، بينما باقي مدن المغرب راه كي العادة باقين غادين بالسيستيم ديال التمانينات داكشي ديال رخاها الله، خصوصا هاد فاس قادوس باش يغطيوه خاصك تسنى عام، راه ماشي مبالغة ولكن راه كاين بلايص كثر من عامين دابا وباقي متصلحوش، خاص واحد الشوية ديال العدالة المجالية، مايمكنش يبقى هاد التركيز ديال المشاريع والسرعة في إنجازها خاص بمدن معينة، بينما مدن خرى لا تقل أهمية عليها غارقة تخلف وكتعاني من الكوارث وجودة الحياة فيها في الحضيض.