الرجاء وعذاب التيران فكل ماتش كيستقبلوه.. ما حيلتهم يلقاو ملعب ما حيلتهم للمدخول الضعيف

ولاو الرجاء الرياضي محنين باش يلقاو تيران فين يلعبو الماتشات ديالهم، وحتى ملعب ما بقى باغي يستقبل ماتشات الفريق بحضور الجمهور او بلا جمهور.
ورفضت السلطات فمدينة الجديدة استقبال ماتش الرجاء الرياضي ضد نهضة الزمامرة برسم الدورة 11 السبت الجاي، بحضور الجمهور، وسلطات الدار البيضاء ما بغاتش تستقبل ماتش الخضرا والدكاليين فتيران العربي الزاولي واخا بلا جمهور، فالوقت اللي قبلت فيه السلطات فبرشيد استقبال الماتش فبرشيد بحضور نسبي ديال الجمهور كيوصل ما بين 2800 و3000 مشجع.
الرجاء الرياضي ولاو معذبين بزاف ملي تسد ستاد دونور للإصلاح، وديما المعاناة عند المكتب المديري للنادي باش يلقى تيران فين يلعب الفريق، اللي كيبقى خاسر ماليا واخا يدخليه الجمهور، حيث المداخيل ديال الماتشات فتيرانات صغار ما شي بقيمة كبيرة.