الناصري مقلق على "ختو" المنصوري. ما فهمش كيفاش تقلبات عليه وهي اللي صالحاتو مع وهبي

علمت "كود" من مصادر مقربة من سعيد الناصري القيادي فحزب الاصالة والمعاصرة والمتابع فحالة اعتقال فقضية "اسكوبار افريقيا" ان هاد الاخير كاعي بزاف ومقلق من فاطمة الزهراء المنصوري ماشي بصفتها رئيسة المجلس الوطني للحزب ولكن حقاش كان يعتابرها "ختو".
علاش هاد الكعية؟ بسباب بيان وقعاتو بلا اجتماع المجلس الوطني يوم 23 دجنبر 2023 اي يومين من قرار قاضي التحقيق متابعتو فحالة اعتقال. وحسب مصدر ل"كود" فقد سول عائلتو واش خرجات شي بيان اخر جبداتو٬ فاشارة الى نداءها هادي يومين٬ لكن٬ تضيف نفس المصادر٬ خبروه باللي داك الشي قديم باش ما يزيدش يتفقص.
الناصري تضيف مصادر "كود" كان يعتابر المنصوري "ختو" يدافع عليها ويدعمها سياسيا وكيعتبرها وحدة من عائلتو الصغيرة. واضافت المصادر ل"كود" انو كان فين ما لقى شي مقال ينتاقدها او يهاجمها من شي جهة كينوض ويتاصل ويردد "هاديك اختي. ايلى آديتيها اديتيني".
وكانت المنصوري هي اللي دخلات بخيط ابيض بين الناصري وبين وهبي بعد ما وقع بيناتهم مشاكل هادي عامين.