السم المراكشي او كيفاش ضربات المنصوري لقجع بلا مناسبة وبعداتو على التراكتور: عندو مهام كثيرة اللي كثر من الحزب

علمت "كود" من مصدر مطلع أن فاطمة الزهراء المنصوري، رئيسة المجلس الوطني لحزب الأصالة والمعاصرة، جبدات فوزي لقجع الوزير المنتدب المكلف بالميزانية، خلال لقاء المجلس الوطني المنعقد ول البارح السبت 8 يوليوز بقاعة السنتيسي بسلا.
طبعا جبداتو بطريقة فيها السم المراكشي. كيفاش؟ شي حد ديالها عضو فالمجلس الوطني سولها على ما يروج على امكانية قيادة لقجع لحزب الاصالة والمعاصرة مستقبلا. درات على الاجوبة وحتى سالات عاد طلبات الميكرو وجبدات الموضوع.
فاطمة الزهراء المنصوري قالت باللي لقجع عندو مسؤوليات ومهام كثيرة منها انو هو زميل فالحكومة وباللي هاد المهام كتجاوز الحزب. فالتواصل باش ترجع تاخد الميكرو كتكون عندك رسالة تبغيها توصل وخاص اللي حاضر يتوصل بيها بوضوح. فالسياسة باش تقول باللي عندك مهام كثر من الحزب كيتعني "سير فحالك. ما بغيناكش. بعد منا".
الرسالة سياسية وحاسمة. المنصوري رسلات رسالة للقجع واخا هو ما عمرو جبد الموضوع ولا بغى يرد فيه بل كذب شي وحدين نشروه وتابعهم. يعني السيد كان واضح. موقفو واضح. المنصوري باش جبداتو واخا عارفة موقفو راه تكريس لديك الرسالة ديال "بعد منا".
المنصوري لعبات على حالة الالتباس اللي كيديرها باش وصلات فالصباح معطلة بدون سبب. وصلات معطلة باش تقول باللي راني جيت بعد ما تلاقيت مع شي حد. هاد الشي اللي فهموه اكثر من عضو فالمكتب السياسي للبام وفق ما اكدوه ل"كود".
بعدها تجي وتقول هاد التصريح على سياسي ما عمرو تار الموضوع راه رسالتها واضحة