انفراد. مصدر حكومي ل”كود”: حتى وزير فالحكومة ما كان فراسو صفقة “ساهام” وعادي بحال هاد الصفقات راها كتفاوض لفترة طويلة وها علاش الحكومة دارت الاعفاء عن التسجيل

قال مصدر حكومي ل”كود” ان ما اثيرحول صفقة “ساهام” اللي كانت نسبة منها فملكية وزير التجارة والصناعة والتكنلوجيات الحديثة مولاي حفيظ العلمي وباعها لشركة جنوب افريقية ما عندو اساس. واضاف المصدر ل”كود” ان الحديث عن تداخل المصالح ما مبنيش على اساس. واضاف المصدر ل”كود” “واش كظنو اش شي وزير فالحكومة كان فراسو هاد العملية البيع والشرا باستثناء المعني بالامر. راها صفقة كتحتاج لمفاوضات طويلة”. الحكومة وفق مصدر “كود” فرحانة حقاش الدولة دخلات 10 مليار درهم من العملة الصعبة.
مصدر “كود” قال ان قضية اعفاء شركات من ضريبة التسجيل جات فواحد الحزمة من الاجراءات اللي دارتها الحكومة باش تشجع الاستثمار فالمقاولات خاصة الصغيرة والمتوسطة٬ واضاف ان هاد الاجراءات كانت من مطالب المناظرة الوطنية حول الاصلاح الجبائي اللي كانت ف2013 كما ان القطاع سبق في مناسبات كثيرة ان طالبت بالغاء رسوم التسجيل بخصوص شراء المقاولات. وكشف المصدر ل”كود” باللي كان هاد الشي خصو يتغير حقاش كان كيشمل حتى الشركات اللي فالبورصة وهاد الشي ما كاين لا فاوربا ولا فافريقيا.
مصدر اخر كشف ل”كود” ان هاد الاجراء اللي ضمن اجراءات كثيرة غادية تربح منها الدولة بزاف. هاد المصدر قال باللي صفقة “ساهام” مثلا دخلات للمغرب مليار دولار. طبعا كاينة ضرائب اخرى غادي يخلصها فصفقة “ساهام” للي باع وفهاد الحالة مولاي حفيظ العلمي٬ وتهم ضريبتي الدخل وضريبة الشركات اللي ما تغيراتش.
خبير في القطاع الضريبي قال ل”كود” ان الدولة ما كانش كتربح بزاف من ضريبة التسجيل على الشركات واكد انه فالعام يالله 200 مليون درهم. هاد الشي قليل. واضاف انه بهاد الاجراء المسثمرين غاديين يدخلو الدوفيز حتى هي والشركات غادية تقدر تنمى حقاش اجراء كيشجع عمليات تفويت المقاولات والاستثمار فيها