جمهور الوداد تفرگع على لحرش وبلقشور: كتحراش غير مع الواك وكيفاش واحد فاشل فتسيير الشأن العام يطور الكورة

عبرت جماهير الوداد الرياضي على احتجاجها تجاه المسؤولين على تدبير العصبة الاحترافية لكرة القدم، وبالضبط رئيسها عبد السلام بلقشور، وهذا الشي بسبب الظلم التحكيمي اللي كيشوفوه الوداديين كيتعرض له النادي.
واستغلت جماهير الوداد الرياضي ماتش الفريق ضد شباب المحمدية اليوم الاحد فتيران البشير ضمن الدورة 17 من البطولة الاحترافية، وطلعو فيه ميساج احتجاجي قاصح على عبد السلام بلقشور رئيس العصبة الاحترافية لكرة القدم، والمتهم بتبديد أموال عمومية من خلال الرئاسة ديالو للمجلس الجماعي للزمامرة.
جماهير الوداد الرياضي، بدات ببوشعيب لحرش عضو المديرية الوطنية للتحكيم، ووجهت له انتقادات قاصحة بسبب التعليلات اللي كيعطي على قرارات الحكام اللي لعبو ماتشات الواك مؤخرا، وهي قرارات كيشوفو الوداديين أنها ظالمة للفريق، ورفعو ميساج قالو فيه: "بوشعيب: حرش مع الوداد ورطب بلاصة آخرى؟".
نفس الفيراج الودادي رفع ميساج، قصح من الاول وهاد المرة ضد عبد السلام بلقشور قالوا فيه: "باقين ضد الازدواجية ولا بلقشور داير خدمة نقية".. "كيف لفاشل في تسيير الشأن المحلي أن يطور كرة القدم".