تلات بينا الوقت. الكوت ديفوار توجو بكوب دافريك والمغرب ربح قلوب الإيفواريين والأفارقة

ربح منتخب الكوت ديفوار لقب كأس إفريقيا للمرة الثالثة فالتاريخ ديالو عن جدارة واستحقاق بشهادة گاع متتبعين الكورة الإفريقية، بعدما ربح نيجيريا فالفينال ديال النسخة 34 اللي تنظمت فالأراضي الإيفوارية، ولكن المغاربة والمغرب ربحو قلوب الإيفواريين والأفارقة.
المغرب وبسياسة رابح رابح اللي نهجها تجاه الدول الإفريقية بقيادة الملك محمد السادس، خلاه يكون بلد محبوب فالقارة الإفريقية، وهذا الشي زاد تأكد وتجسد فكوب دافريك 2023 فالكوت ديفوار، والإيفواريين اللي ولاو كيحماقو على المغرب حيث عاونهم بزاف لضمان الاستقرار فبلادهم والتطور الاقتصادي والاجتماعي، وزاد المغرب عاونهم فالتتويج بكوب دافريك، مللي أهلهم لثمن النهائي بعدما كانوا مقسيين من الدور الأول.
المغاربة اللي كانوا فالكوت ديفوار فكوب دافريك، عاشو حوايج زوينين مع الإيفواريين وخلاو الكوت ديفوار كاملة تبغيهم بليجيست اللي دارو، ها اللي تبرع للأيتام وها اللي ساهم فالتعريف بالسياحة فالكوت ديفوار، وها دشي من غير الرواج الاقتصادي اللي ساهمو فيه والتمغرابيت اللي نشروها وسط الإيفواريين، بأشياء ما عندها ثمن، حيث المغاربة وهما أكبر جمهور ديبلاصا للكوت ديفوار فكأس إفريقيا ساهمو بكل ما عندهم باش يرسمو الفرحة والنشاط على الإيفواريين خلال شهر ديال المسابقة.
الإيفواريين ربحو كوب دافريك ولكن ما نساوش الخير، وفالشوارع ديالهم والديور والتيران وفالفينال كانوا ديما رافعين العلم المغربي مع العلم الإيفواري، فلحظات ديال الاعتراف بالجميل والتعبير على حبهم للمغاربة والمغرب، وكلشي شاهد على لحظات رفع كأس إفريقيا فتيران الحسن واتارا وسط أبيدجان وكيفاش كابيتان المنتخب الإيفواري ماكس ألان كراديل رفع العلم المغربي ومتمسك به وهو كيرفع اللقب، وكيفاش الملعب كامل رافع الدرابو المغربي فلحظة تعبير على عشق الإيفواريين والأفارقة للمغرب والمغاربة.