الوداد جابو الرباح من بوتسوانا وعندهم ماتش مصيري مع لاسيك فمراكش ويتسناو كادو من گلاكسي ضد سيمبا

رجعو الوداد الرياضي برباح مهم من بوتسوانا بفوز على گلاكسي البوتسواني اليوم السبت، ضمن الجولة 5 من دور مجموعات دوري أبطال إفريقيا، وحافظ الفريق على الحظوظ ديالو للتأهل إلى ربع النهائي.
وسالا الماتش بين الوداد الرياضي وگلاكسي البرتسواني بنتيجة واحد لزيرو، فماتش كان صعيب بزاف بسبب الضغط والگازون ديال تيران أوبيد إيتاني ستاديوم والحرارة فمدينة فرانسيستوون، وهدف الوداد الرياضي ماركاه بدر گادارين فاللحظات الأخيرة من الشوط الاول، وقدر الفريق الأحمر يحافظ عليه حتى سالا الماتش، واخا گلاكسي جاهم بيلانتي تسبب فيه الگول الودادي يوسف المطيع ولكن الأخير صحح الغلط ديالو وحبس البيلانتي.
وبهذا الرباح حافظ الوداد الرياضي على الحظوظ ديالو فالتأهل إلى ربع نهائي دوري أبطال افريقيا حتى الجولة السادسة والأخيرة من دور المجموعات، وارفع الرصيد ديال إلى 6 نقاط بالتساوي مع سيمبا التنزاني مع امتياز للاخير بسبب النسبة الخاصة (نتائج المواجهات المباشرة بين الفريقين)، ورا أسيك ميموزا الايفواري اللي تأهل كمتصدر للگروب 2 برصيد 11 نقطة، وگلاكسي البوتسواني رجع للمركز الأخير بعد هاد الخسران وبقات عندو 4 نقاط.
الوداد الرياضي وباش يتأهلو لربع النهائي من دوري أبطال افريقيا، خاصهم يربحو أسيك ميموزا فالجولة السادسة والأخيرة من دور المجموعات، وهو الماتش اللي غيتلعب السبت 2 مارس فتيران مراكش، باش يولي رصيدهم 9 النقاط، ويتسناو سيمبا التنزاني يخسرو مع گلاكسي البوتسواني أو على الاقل يتعادلو، مع العلم ان گلاكسي حتى هما حظوظهم مازال كاينة وأملهم انهم يربحو سيمبا فبلادنا تنزانيا ويديرو 7 بوان ولاسيك تربح لهم الوداد فمراكش، وبالمقابل إذا سيمبا ربحو گلاكسي غتولي عندهم 9 بوان ويتأهلو ما يتسناو حد حيث متفوقين فالنسبة الخاصة على الوداد الرياضي واخا الأخير يربح لاسيك.