اللبؤات ل"گود": فرحانين بالرباح على تونس وكنشكرو المغاربة اللي شجعونا وغنربحو زامبيا ونتأهلو لأولمبياد باريس

عبرو لاعبات المنتخب الوطني المغربي لكرة القدم النسوية، على الفرحة ديالهم بالتأهل إلى الدور الرابع من إقصائيات دورة الألعاب الأولمبية "باريس 2024''، وأكدو أنهم غيديرو اللي فجهدهم باش يربحو منتخب زامبيا فهاد الدور ويتأهلو للأولمبياد ويفرحو المغاربة.
وهضرت غزلان الشباك كابيتان المنتخب المغربي النسوي بعد رباح المغرب على تونس بنتيجة 4 لواحد ضمن إياب الدور الثالث من إقصائيات الأولمبياد، وقالت لميكرو "گود": "فرحانين بالرباح على تونس ومن حقنا نفرحو ونتمتعو بهاد الرباح وغنركزو على اللي جاي، حيث صعيب وبقات لنا الخطوة الأخيرة ونحاولو نعطيو جهدنا كامل ونتأهلو للأولمبياد باش ندير استحقاق تاريخي".
وبخصوص الماتش ضد زامبيا قالت حنا ديجا لعبنا مع المنتخب الزامبي كنعرفوه مزيان منتخب كبير وعندو عناصر قوية وحنا غنلعبو الماتش ديالنا ونعطيو كاع اللي عندنا ونركزو على راسنا وأسلوب اللعب ديالنا نطبقوه ومن دابا غنفكرو فهاد الماتش المهم وكنتمنى نحققو فيه التأهل".
نجاة بدري حتى هي فرحانة بالتأهل وقالت: "ماركينا بكري على منتخب تونس وربحنا، ودابا ما غنوقفوش هنا مازال عندنا خطوة باش نحققو حلم وإنجاز تاريخي، والماتش غيكون ضد المنتخب الزامبي اللي ماشي سهل وغنخدمو على نقاط القوة ونقاط الضعف ديالو، وكنشكر الجماهير المغربية اللي جات ساندتنا ولعبت واحد الدور كبير وهي اللاعب رقم 12 فالتيران وكنقولهم شكرا وديما جيو ساندونا".
وعبرت حنان آيت الحاج على السعادة ديالها بالرباح اللي حقق المنتخب المغربي والتأهل وقالت: "الحمد لله ضمنا التأهل للدور الرابع والأخير من إقصائيات أولمبياد باريس، وكنشكر اللاعبات والطاقم التقني وكاع اللي عاونونا باش نتأهلو لهاد الدور وشكرا بزاف".