الركراكي: حارث كان يستاهل يجي للمنتخب المغربي

اكد الناخب الوطني وليد الركراكي انه كيثيق فأمين حارث وانه ما عيطش له باش يعطي فرصة اخرى للاعبين اخرين، وقال بلي كان يستاهل يجي لماتشات ليكيب ناسيونال ضد أنگولا وموريتانيا ولكن كيبقى الغياب ديالو راجع لاختيار المدرب.
وقال وليد الركراكي خلال الندوة الصحافية قبل ماتش المغرب وأنگولا وقال: "أنا أول واحد كتيق فأمين حارث.. قبل من كوب ديموند توعت ورجع وجبتو معيا ولعبتو".
وكمل الناخب الوطني: "دابا عندنا تاريخ الفيفا وحتى أنا خاصني نجرب باش نشوفو أحسن منتخب اللي غيلعب فكوب دافريك وجا التوقيت باش نشوفو لاعبين اخرين".
وزاد الناخب الوطني وقال: "حارث كنعرفو.. كاينين بزاف ديال اللاعبين اللي ما كينينش حتى هما فلاليست، وهاد السطاج مهم باش نعطيو دم جديد الكروب ونشوف لاعبين اخرين وفالبوسط ديالو عندنا بزاف ديال المنافسين واخا أمين كان حتى هو يستاهل يكون معنا بحالو بحال بزاف ديال اللاعبين وهذا اختيار المدرب".