أزمة طلبة الطب وصلت ل4 شهور من الاحتقان..لجنة الطلبة فتهديد جديد للحكومة بسنة بيضاء: مضطرين نديرو مقاطعة شاملة

قالت اللجنة الوطنية لطلبة الطب وطب الأسنان والصيدلة بالمغرب، بأن "طلبة الطب والصيدلة وجدوا أنفسهم مضطرين للدخول في مقاطعة شاملة ومفتوحة أملا في التفاتة المسؤولين لملفهم والاستجابة لمطالبهم دفاعا عن قضيتهم العادلة والمشروعة".
هاد الخطوة للي علنات عليه لجنة طلبة الطب جاءت بعد ايام قليلة فاش قالو بلي غايديرو حسن نية، موراها انقلبو وأكدو اليوم بلي غايرجعو للاضراب والمقاطعة الشاملة.
أزمة طلبة الطب وصلت ل4 شهور دبا، احتقان كبير فالكليات وبلا حلول. الطلبة رفضو عرض الحكومة ومتمسكين بمطالبهم.
الملف مبقاش بيد الوزير المعني بهاد للي هو عبد اللطيف ميراوي، وزير التعليم العالي والبحث العلمي وتكوين الأطر، الملف دبا بيد رئاسة الحكومة، كتفكر تشوف الحل المناسبة لهاد الأزمة.
ماشي المرة الأولى كيتدخل رئيس الحكومة، فحل مشاكل قطاع التعليم العالي، حيث سبق وتدخل وحل أزمة اضراب اساتذة الجامعة للي رضاوهم بزيادة مهمة فالصالير.
يشار بلي رئيس الحكومة كشف فحوار مع الأولى ودوزيم، بلي مغاتكونش سنة بيضاء فكليات الطب وبلي غايتم حل باقي المشاكل العالقة بعد الاستجابة ل45 مطلبا ضمن 50 مطلبا.
الطلبة باغين زيادة فالتعويضات ديال التكوين والتداريب وتقليص سنوات الدراسة، تخفيف الاكتظاظ في قاعات الدروس.
غير هو واحد الشعار رفعوه ميمكن حتى واحد يثيقهم، كيقولو بلي خرجو للاحتجاج بهدف الرفع من جودة التكوين الطبي والصيدلي وتقديم خدمات صحية ترقى إلى تطلعات المواطن المغربي".