كود" تنفرد بنشر مذكرات محمد سقراط في السجن(الحلقة الثامنة عشر): الرشوة وصراع العائلات: نوفل كان كياكل كلشي جديد وكيلبس غير سينيي ونهار خرج خلى لي المانطة

كان في وضع دفاعي طيلة اليوم, إذ يتواجد في بيئة معادية بالنسبة له , ما الذي قد تنتظره من واحد ولد عائلة, وبوكوص حقيقي, وكان خدام مضيف طيران فالخطوط الإماراتية, إلا أن يتخد وضعا دفاعيا في مثل هذا المكان, مونتيفو كان بسيط , تناقش مع صاحبتو مشى عندها للدار لتسوية الوضع, كانوا معاها بعض رفاقها, نقز واحد منهم جنتلمان كثر من لقياس, وباينة كان مخبي فلائحة الإنتظار, وبغى يعزز الحظوظ ديالو بتحقير نوفل, فما كان من هذا الأخير إلا أن ضرب دينمو بواحد الكروشي, خرج فيه كاع داك الغضب, وهرسليه لاماشوار ديالو, باش يتعلم يدخل سوق كرو و يتنافس بشرف ماشي بقذارة.
عائلة نوفل لاباس عليهم, وعائلة الضحية هكاك, وهنا بدات المنافسة فخسران فالفلوس , الأولين كيعطيو لفلوس كرشاوى ودايرين جوج محاميين بحال إلى ولدهم مشدود فخلية بلعيرج,و دايرين فوق جهدهم من أجل أنقاذ ولدهم من الضياع, والتانيين خاسرين شلا فلوس حتى هوما من أجل أن يذهب نوفل فين يتربى, وميعاودش يزعم على ولاد العائلات راه عندهم لي يدافع عليهم, والى عاجباه صحتو هاهو غيمشي فين يجربها .
فالحومة عندنا كتسلخ بنادم وكتخلصليه غي الدوا وتزيدو شي ألف درهم, والى كانت شي حاجة مقودة تقدر توصل معاه حتى لمليون, وهانتا هاني مكاين متابعة مكاين والو , ولكن بحال هاد الأسر كيعتابروا الأمر اهانة جماعية لعائلتهم, وحتى لوضعهم الإجتماعي و مكيرتاحو حتى ينتاصروا على الآخر ولو بتدميره .
داك النهار رجع نوفل من المحكمة فحالة هيستيرية, بقا كيبكي بحال الى انتهت الحياة بالنسبة ليه, أو بحال الى حكموا عليه بالمؤبد, وهو عطاوه غي شهرين ديال الحبس, لي كانت عندنا حنا عادية, ومكتعنيش شي ضرر كبير, ومتقدر تغيرلينا فحياتنا والو أو تأثر عليها سلبيا, ودغية كتدوز, ولكن بالنسبة ليه هو, كانت كتعني فقدان العمل بصفة نهائية, و فقدان فرصة لإيجاد عمل مستقبلا, وشوهة بين العائلة والأصدقاء, وماضي سيئ غادي يبقى ملاحقو طيلة الحياة , كنا كنصبروه ولكن فالحقيقة مكناش حاسين بيه, ومكناش كنعرفوا آش كتعني شهرين ديال الحبس فالحياة المهنية لمضيف طيران, بالنسبة لينا حنا راه مكانت ضاراه فوالو , السيد كان كيكمي غي المالبرورو, ومفرش المازافيلات, ولابس غي السينيي, التيشورطات لاكوست والبولو, والكيطمات ديال النعاس أديداس, ونهار كيمشي للمحكمة كيضرب قويمجات ماسيمو دوتي, بحال الى غادي لحفل توزيع جوائز الأوسكار, تحشم تديرليه المينوط, أوتعيطليه بسميتو حرفية نوفل, خاص سي نوفل, كان مكاياكلش الماكلة ديال الحبس نهائيا, وكتجيه البانية يوميا, السيد كان كيتغدى من عند كينتاكي و كيتعشى من عند لاكاسا دي أيطاليا, وكل نهار وشهيوتو ومكتعاودش على طيلة الأسبوع, البانيني كان كيجيه باقي سخون من أحسن المحالات, المهم الحياة السعيدة بالنسبة لينا, و لكنه مع ذلك كان كيعاني, راه غي مجرد الإنتقال من الخراء في طواليطات الفنادق الجيدة عبر العالم, للخراء فهاد الطواليط ديال الحبس يعتبر بالنسبة له حفلة تعذيب سادية .
باش ميبقاش ليه الوسخ فالضوسي خاصوا شلا فلووس عاوتاني ملي يخرج, ولكن كما قال هو :
_ لا ... لا ... راه هانية , كاين واحد السيد من العائلة فالداخلية هو غيتكلف بهادشي .
_ ومالك فارعلينا كرنا بالبكى أصاحبي ؟
_ راه الحبس أصاحبي هانتا شوف فين حنا ؟
و يدير رأسه عبر الغرفة, وأتبعه أنا أيضا باش نعرف المعنى ديال هدرتو, وأتأمل فالشامبري مزيان, فركام الأجساد البشرية المدكوكة شي مع شي, في الوجوه البئيسة لبعضهم, وفي حقارة البعض الآخر, فأجساد بعضهم الموشومة والمخططة, وفوجوههم لي وجوه الحبس نيت , تخترق أذني لغتهم البيضانصية المشحونة بالمفردات الجنسية المذلة و المخضعة, وأعيد النظر إليه, الى بشرته البيضاء الصافية, وعينيه الخضراوتان الغامقتان, وشعره البني الفاتح, ولحيته الغير مشذبة, والتي زادته وسامة, وملابسه الأنيقة ..... _الصراحة نتا ماديالش هاد الحالة ؟
قانونيا باش يحيد الوسخ من الضوسي, خاصوا يتسنى مرور تلاتة سنوات ونهار دون أي يعيد الكرة, عاد ديك الساعة يدير رد الإعتبار تحت إشراف محامي, وأراك لواحد المتاهة بيروقراطية, وأرى لجميع لوراق بحال الى عاد غادي تولد من جديد, حتى كتولي تدير مناقص كحال العديد , هادشي غي فحالة جنحة أما جناية راه خاصك خمس سنوات ونهار , بقيت كنقول مع راسي مثلا بحال هاد الشاب علاش ميحكموش عليه بالقيام بشي أعمال مدنية مثلا, أو دفع غرامة مالية تستافد منها خزينة الدولة, عوض ميخسر كثر منها غي رشاوي , باش غادا تستافد الدولة من سجن بحال هاد الشاب على ود جنحة بسيطة, وتخرج عليه وتخرجليه على حياتو وتضيعليه مستقبلو , واش زعمة هنا غادي يتربى ويتعاقب , الزفت , هنا كيدخل بنادم غي دار خطأ بسيط عن غير قصد, كيخرج مجرم كبير كيدير أخطاء كبيرة وعمدا, وكيولي يرجع للحبس بحال الى راجع للدارو .
في الإستناف حيدوا لنوفل شهر ودوز غي شهر, نهار كان خارج خلا ليا مانطة, كانت هاديك أول مانطة كنحصل عليها كورث من الحبس, و خلا ليا نمرتو باش ملي نخرج نتاصل بيه( باقي متاصلتش بيه لحد الآن). كان فرحان باغي يطير حرفيا, وكنا فرحانين ليه حتى حنا, حوايجو كلهم فرقهم, مخرج حتى حاجة من غير داكشي لي لابس, خرج خفيف و طويل, ولابس مزيان, لوسط كيليز مع العشرة ديال الصباح, فيوم مشمش كباقي أيام صيف مراكش .........شكون غادي يتيقوا ملي يفوت الباب على أنه عاد خارج من الحبس .