ايلى فهمتو شي حاجة ها وجهي. بنعبد الله عن قيس وليلى الحكومة: هاديك حياة شخصية وعلاقتهما تعنيهما ولكن ما كاين حدود بين الحياة الشخصية والعامة بالشخصيات وحنا ضد التعدد =فيديو التناقض=

نبيل بنعبد الله الامين العام لحزب التقدم والاشتراكية ووزير السكنى حصل حصلة فشي شكل البارح فلقاؤو مع وكالة المغرب العربي للانباء بالرباط. الموضوع قيس وليلى الحكومة المغربية اي لحبيب لشوباني وزير العلاقات مع البرلمان والمجتمع المدني وسمية بنخلدون الوزيرة المكلفة بالتعليم العالي وقصة تقدم زوجة الوزير رفقة امه لخطبة الوزيرة كي تصبح زوجة ثانية.
الوزير التقدمي الحداثي قال "هادي حياة شخصية ونؤكد على هذا الامر مجددا" اييه اسيدي حياة شخصية وكيفاش "نعتبر الامر يعود اليهما".
ولكن هما راهم فحكومة يعني منصب كيمثل لمغاربة بالاضافة انهم قدوة وتصرفاتهم محسوبة.
بنعبد الله دخل فواحد التناقض. بدا فالاول كيقول "صعيب الواحد يتكلم على الحدود والفاصل بين الحياة الشخصية والعامة عندما يتعلق الامر بشخصيات". ها اللي كلنا صعيب وعلاش كتكول الحياة الشخصية اذن.
وغادي يتناقض اكثر عندما يتحدث عن تأثير ذلك على التحالف الحكومي اذ قال "لو طلب رأينا غادين نقولو عفيونا كحكومة من هذا الامر. نحن في غنى عنه". ياك حياة خاصة وكتكولها علاش بغيتهم يعفيو الحكومة. اذن ما بقاتش حياة خاصة.
التناقض الاكثر فتصريح زعيم البي بي اس وهاذا هو اللي قلق الحداثيين من هاذ الزواج بين قيس وليلى الحكومة هو ان الوزيرة غادية تولي زوجة ثانية. السي بنعبد الله كال بحال ايلى مخبي وفلسفها قبل "على المستوى القيمي لن يغير حزب التقدم والاشتراكية موقفه من التعدد ومن تعدد الزوجات". دابا ايلى كنتي ضد التعدد خاصك تكون ضد هاد الزواج وكولها بصراحة بلا ما تخاف