! انا فنان و ماراضيش بخدمتي كانساين نجمع لفلوس و نتوب ! كاع الفنانة فالعالم فخورين براسهم الا فالمغرب علاش؟‎

—
لفنانين عبر العالم كاتلقاهم فخورين بالفن لي كايقدموه و كايبدعو فيه ، كايعطيو مافجهدهم باش الفن ديالهم يزيد لقدام ، حيت الفنان ماشي انسان عادي فحال الاخرين ، الفنان كايبقا واحد الشخص مختلف عن القطيع، كايشوف و كايحس و كايفكر بطريقة مختلفة و هادشي لي كايخليه يخلق الابداع… و هادي هي القاعدة لي كاينة فالعالم كلو و عطاتنا مجموعة من الابداعات فالسينيما و الموسيقى و التلفزيون و المسرح


طبعا المغرب بلد الاستثناء ! فكلشي حتا فالفن للاسف ! يعني لي ماعندو زهر ما عندو حتا فخلا دار بوه، هادي هي الخلاصة لي يمكن اي واحد يوصل ليها فاش كاتشوف فنان مغربي كايهضر على خدمتو بهاد الطريقة " الله يعفو علينا و نتوبو من هادشي " ! " بغيت نتوب و نمشي للحج و نحبس التمثيل و الغنا"…ها لي بغا يتوب حيت كايساهم فنشر الرذيلة ها لي بغات دير النقاب مرضاة لله عز و جل ! الاعتزال اختيار كايبقا عند اي فنان و عادة الفنان كايعتازل فاش كايحس براسو عيا و مابقا عندو مايعطي للجمهور ، فالمغرب الفنان كايعتازل فاش كايعيا و كايشبع فلوس و كايبغي يوجد للآخرة ديالو من بعد ماكايكون وجد للدنيا وجد لراسو و لولادو واحد التقاعد مزيان فيه حوانت و فيلات و فيرمات و طوموبيلات و ديور و واحد البركة مهوة فالبنكة !


العيب ماشي هو الاعتزال ! العيب هو انك تنكر ديك المهنة لي كاتصور منها طرف د الخبز صحيح و تبغي دير فيها نزق ، حيت الانسان فاش كايتوب فراه كايتوب على شي حاجة خايبة ! و هادي اكبر اهانة يمكن يوجها فنان للفن ديالو و للناس د هاد القطاع ، شنو معنيتها انو فنان يقول فالتلفزة "كاندعي الله يعفو عليا من هادشي ؟ " واش واكل فلوس ليتاما ؟ كاتبيع و تشري فالسلاح ؟ خدام كات***د القاصرات ؟ !



هادشي راه فن ! ابداع ! كيفاش يمكن انو نتسناو من واحد الشخص لي هو اصلا ماراضيش بخدمتو يديرها مزيانة و يبدع فيها ؟كيفاش يمكن لمغني غير مقتنع بداكشي لي كايدير و لا بممثلة حشمانة من التمثيل يبدعو و يخلقو لينا اعمال فالمستوى ؟ راه مايمكنش لاي واحد يعطي فشي دومين لاماكانش عاجبو داكشي لي كايدير و عاجبو بزاف ! اما باش تكون كاتغني و لا كاتمثل و لا كاتشطح من اجل المرقة و لا شيء غير المرقة و نتا كاتساين غير فوقاش تجمع دكسة د الفلوس و تعتازل باش توب فهادي راها قمة النفاق المجتمعي ! قمة السكيزوفرينيا خلاوها سيادنا اللوالا "عيني فيه و تفو عليه " بالعربية تاعرابت الفن خايب و فلوسو زوينين ! الفن حرام و فلوسو حلال ! التسافير و السهرات على برا و القصاير و الشهرة زوينين فاش كايكون بنادم كايدخل منهم الصرف و كايوليو خايبين و حرام و منكر فاش كايعيا الفنان و كايجمع ما تيسر من الدراهم باش يمشي للحج !

ايوا ملي الفن حرام و رذيلة لاش حطيتي فيه رجليك النهار اللول ؟ لاش شطحتي و غنيتي و مثلتي تا عركتيها فلوس عاد بان ليك سيدي ربي ؟ و ملي الفن حرام و بنادم خاصو يعتازل و يجمع راسو باش يلقا الله ، زعما غايكونو فلوس الفن حلال ؟ فلوس الغرامات و المهراجانات و عومار حلال ؟ حنا غير كانطرحو اسئلة لي يمكن يطرحها اي واحد على راسو فاش كايشوف نفس القصة كاتعاود، كايجي فنان كايتشهر كايغني كايمثل كايشطح كايجمع الفلوس و كايتوب من "الفن" من بعد و كايقول "عفا علينا الله" فحال لا كان كايبيع الكيف ! يا ودي يا الابداع يا ودي …


راه لي كايشطح ماكايخبيش لحيتو و الانسان هو لي يكون واضح مع راسو و مع الله ! حيت انك تسترزق من الفن و تكون بيه ثروة و نتا فخاطرك مقتنع بانو حرام و خاصك توب منو ! و تساين حتى تأمن مستقبلك و مستقبل ولادك عاد تعتازل راه قمة النفاق و الانتهازية مع راسك و مع الجمهور و الناس لي متبعينك … زعما نتا هو الذكي ! هو القافز ! ولد الوقت باغي تربح الدنيا و الآخرة و بأقل الاضرار و الخسائر ! الفن ماشي عيب راه غير المجتمع الهايش مايشي لي كايحكم عليه بمعايير اخلاقية تا كايقتلو و كايرضو عيب و لكن العيب د بصح هو النفاق و العقلية د المرقة لي مسيطرة على مجموعة د الفنانة.