انفراد. محاربة الفساد بالفعل ماشي بالشفاوي وها اللي خاص حكومة بنكيران تبعو. شوفو كيفاش كيحارب الحموشي الفساد وسوء التدبير فالادارة العامة للامن الوطني: فعام ربح 7.80 مليون درهم غير فالمحروقات

محاربة الفساد وسوء التدبير والتبدير ما كدارش بالشفاوي. عبد اللطيف الحموشي المدير العام للمديرية العامة للامن الوطني خدام غير بالصقيل وفالصح. حسب معطيات حصرية حصلت عليها "كود" فان الحموشي دار اللي ما عمر شي حد دارو غير فقطاع المحروقات. حضيرة السيارات ديال الامن الوطني كانت كتستهلك بزاف وجا هو رجعها للنص.
فحسب معطيات حصلت عليها "كود" فان ميزانية استهلاك المحروقات ما بين يونيو 2015 ويونيو 2016 انخفض الى 50 بالمائة. في يونيو 2015 بلغ حجم الاستهلاك 1.5 مليار و681 الف و140 درهم هاد الرقم بلغ شهر يونيو 2016 بلغ 7.80 مليون اي انخفض ب50 بالمائة.
كيفاش ربح 7.88 مليون درهم فعام؟ اول حاجة كلشي تغير باش يتم عقلنة التسيير. اذ بدآ تزويد حضيرة السيارات بليصانص على حساب المسافة اللي كيقطعوها. الطونوبيلة اللي كتضرب 100 كلم كتاخد ليصانص اللي كيكفيها. سالا التسيب والبلان ودير ليصانص الوقت اللي بغيتي.
حاجة اخرى لعبات دور فتخفيض نسبة الاستهلاك وفق مصدر "كود" هو "1305 سيارة متهالكة تابعة لحضيرة الامن الوطني مشات للفوريان. ما بقاتش صالحة وكانت كتاكل بزاف وكتطلع على الادارة العامة بفلوس كثيرة لكل طونوبيلة. وفوق هاد الشي كولو٬ اوضح مصدر "كود"٬ بدا نظام مراقبة استهلاك المحروقات عبر نظام معلوماتي.
الحموشي بعد ما فتح اوراش كثيرة ديال المعهد الملكي للشرطة وطريقة ولوجه وتكليف الجامعة بتصحيح الاوراق فتح ملف اخر باش ينقي الذمة المالية للمديرية العامة للامن الوطني٬ اذ تم اداء كل المتاخرات. خلص ف2016 مليار و32 مليون متاخرات 2015 بالاضافة الى خمسة مليار و786 مليون كان خلصها ف2015 وهي متآخرات ديال 2012 الى 2014