خويا الصنهاجي الضرافة والتواضع والضحك ما عمرو تحرش ببنت ولا دخل فشي حد غلطتو الوحيدة عاش لحظة خاصة مع اولاد لق…اللي سربو الفيديو

بالنسبة لفيديو مايسمى ( فضيحة سعيد الصنهاجي )
وطبعا ان ضد هاد الكلمة ديال فضيحة على بحال هاد الفيديو لأن انا قلت اواااااه فضيحة ياكما حصلوه موظف شبح او كينهب وكيسرق أموال الدولة أو داير شي جريمة بحال القتل أو الإغتصاب أو العنف ولا خدا حق مولات المسمن ولا صرفق مولات البغرير وقاليها عرفي راسك معامن كتهضري أو …. أو …. والأمثلة عديدة لمفهوم الفضيحة عندي .
دخلت نشوف وقلت وايلي كنعرف الصنهاجي الله يعمرها دار بوهالي مسكين وولد الدار الكبيرة وحاجتو ماشي ديالو ، كيعاون الناس و عمرو ماعاير ولا غلط في شي فنان ولا حسد ولا غار من شي واحد في الساحة وعمرو مادار شغل المافيا الفنية اللي كيديرو بعض الفنانين ضد المنافسين ديالهوم حيت ماعندهمش ثقة في نفسهم .
الصنهاجي الضرافة والتواضع والضحك .
عرفتو شكون المفضوح أو المفضوحة في نظري هو اللي صور الفيديو ونشرو خصوصا أن الفيديو باين في دار أو فندق يعني سهرة خاصة جدا ماشي حدا البحر في ميرسيديس . من حق الصنهاجي يعيش حياتو الخاصة كيفما بغا تاواحد ماعندو الحق يتدخل فيه غير عائلتو .
احنا لينا فقط الصنهاجي فوق المسرح واش عمرو تحرش بشي واحدة ولا قل أدبو على شي حد كيطلع يدير السهرة ديالو وكيجامل الصغير قبل الكبير وكيغني اللي طلبها الجمهور وعمرو ما خصر لشي حد .
جمهورو الحقيقي خاص يساندو ماشي يزيد ينشر الفيديو وحتى إيلا كان شاف الفيديو بلا مايشوف في سعيد نظرة ناقصة .
نهضرو بالعقل والمنطق بعيد على النفاق واللامنطق اللي مسيطر على عقول الأغلبية شكون فيكم اللي ماعمرو باس وماعمرو تزعط و ما عمرو تصاحب وماعمرو دار ليلة زاهية ، وبلا ماتكذبو على راسكم راه احنا عارفين دابا بنات 14 عام كتقوليك مون ايكس يعني تصحبات و باست وعاشت قصة حب مع ولد الجيران ولا اللي التلميذ اللي تايجلس حداها في المدرسة ولا عاشت قصة حب من طرف واحد مع استاذها البوكوص ولا مع شي فنان معلقة تصاورو في كتابها وكاتبوسو صباح وعشية وكون تلاقاتو في سهرة خاصة كون دارت معاه الوعاوع و شحال من ولد ماكرهش يكون عندو برتوش و حديدة و مدور بيه التيتيز و الفتاتش .
حاولو تحطو راسكوم في بلاصة سعيد وماتحكموش من بلاصتكم و تقساو على فنان غلطتو الوحيدة انه عاش لحظة في حياتو الخاصة مع ولاد الق…… اللي سربو الفيديو .
وحاولو تفكرو اشنو سبب تسريب الفيديو ابتزاز ولا أعداء النجاح ولا أشنو ….. والفيديو خاصو يتسينيالا ويتمسح لأن ماشي الصنهاجي اللي حطو باش يشوفوه جمهورو .
خويا سعيد قلبي معاك في مجتمع تايحكم بلا محكمة وتايعدم بلا قرار إعدام و تحياتي لكل من قال شغلو هاداك حياتو الخاصة العيب و العار ايلا غلط في الجمهور و هو فوق المسرح .
رسائلي للكبار فهما لا الكبار سنا ..
الله يجيب اللي يفهمنا و لا يعطيناش…