دخلنا للديموقراطية الحسنية بيس. ايلى خسرتي الانتخابات وما كانتش عندك شعبية وحزبك ما عندو وجود فالمجتمع لا خرجتي على بوه يمكن ليك دير حكومة واخا ملك لبلاد عين رئيسها وبقى غير تسنى التعليمات وغادي تربح

ماشي صدفة ان اربعة احزاب "الاتحادين الاشتراكي والدستوري" و"الحركة الشعبية" و"التجمع الوطني للاحرار" خرجات بيان فذكرى وفاة الملك الحسن الثاني مول الديموقراطية الشهيرة باسمو وساعتين او ثلاثة قبل من الحفل الديني اللي غادين يديروه ليه فالرباط ويرأسو الملك محمد السادس. ديموقراطية رجعات مع هاد البيان العجيب. وماشي صدفة ان هاد الاحزاب اللي ما كتحرك الا بالاوامر خرجات بيان ساعات قبل المجلس الوزاري و15 يوم بعد مطالبة الملك عبر مستشاريه من رئيس الحكومة المعين عبد الاله بنكيران بالاسراع بتشكيل الحكومة.
اللي كالوه هاد الاحزاب خطير على الديموقراطية. مهين لكل من صوت في الانتخابات التشريعية الاخيرة لسابع اكتوبر. مهين حقاش الرسالة ديال هاد البيان. عطيو الصوت اللي بغيتو. اولا مع هاد التقطيع الانتخابي ومع نظام اللائحة ما عمر شي حزب يفوز بالاغلبية وثانيا واخا تبقى للاغلبية غير 3 الاصوات راه رئيس الحكومة المعين والله ايلى حلم بتكوينها.
دابا الملك معين بنكيران وهاد الاحزاب عوض ما تخرج بيان وتكون عندها الشجاعة وتقول ما داخلينش الحكومة كاع٬ هاديك الساعة يمكن شي حد يحترمهم. لكن يديرو بيان يكولو فيه راه حنا حمية وغادين نغلبوه يا بنكيران اللي داير فيها سبع هادا منتهى العبث.
هاد الاحزاب ديال الكرطون قالت فبيانها انها حريصة "على المساهمة في تشكيل أغلبية حكومية تتماشى مع مضامين الخطاب الملكي بدكار، والذي نبه فيه جلالته إلى ضرورة تكوين حكومة ببرنامج واضح وأولويات محددة، للقضايا الداخلية والخارجية. و كذا حكومة قادرة على تجاوز الصعوبات التي خلفتها السنوات الماضية". فهادي كيخربقو. اكيد حتى واحد ما مقتنع بهاد الشي بما فيهم هاد الاحزاب
كاليك "تجدد انفتاحها على مواصلة المشاورات مع السيد رئيس الحكومة المعين، من أجل الوصول إلى تشكيل أغلبية حكومية تخدم المصالح العليا للوطن، لكن على أساس أغلبية قوية ومتماسكة، قادرة على تنفيذ البرامج الحكومية على المدى القريب والبعيد٬ ولا تخضع لأي معايير أخرى بعيدة عن منطق الأغلبية الحكومية المنسجمة والمتماسكة".
اش هاد التخربيق واش هاد الاغلبية المنسجمة والمتماسكة. كولو بغينا نديرو حكومة جديدة واخا بنكيران رئيسها الجديد
والتبرير الثالث الاكثر غباء هو كاليك بغينا تكوين حكومة قوية وان هاد الاحزاب ديال الكرطون تلتزم "بالعمل المشترك من أجل الوصول الى تقوية و تعزيز التحالف الحكومي، الذي أضحى ضروريا لتشكيل إطار مريح، قادر على ضمان حسن سير مؤسسات الدولة".
هاد الفضيحة بهاد البيان ديال العار تعلن هاد الاحزاب ميلاد الديموقراطية الحسنية بيس. يعني كيكولو لمغاربة مالكم صدقتو باللي اللي صوتو عليه لمغاربة غادي يكون بصاح رئيس حكومة وفيقو راه غير الكاميرا الخفية هادي