البلوكاج الحكومي. الاحرار على كلمتو: تفك من الاستقلال واجي نخدمو جميع وما تعتقدوش باللي اخنوش دمية تحرك من الخلف من شي جهة راك اسي بنكيران جربتيه مزيان وكتعرفو وما غاديش يغير موقفو لا مشاركة مع شباط وحزبو

مازال البلوكاج الحكومي مستمر فالمغرب. تقديم عزيز اخنوش رئيس حزب التجمع الوطني للاحرار رفقة مولاي حفيظ العلمي٬ العزاء لعبد الاله بنكيران رئيس الحكومة الحالي والمكلف بتشكيل الحكومة المقبلة في وفاة والدته يوم امس الاربعاء ببيته في الرباط والصور المعبرة والعناق الحار والحديث الخاص لم يقدم او يؤخر في تشكيل الحكومة. هاداك صواب بتقديم العزاء وصافي حسب مصادر "كود".
المثير ان هذا اللقاء حضره نبيل بنعبد الله امين عام التقدم والاشتراكية واحد مكونات الاغلبية السابقة والحالية. لقاء دون سبق اعداد. كلهم جاو بدون اتفاق يعزيو وفق مصدر "كود".
هاد العزاء اللي واخا يهدرو فيه شوية على السياسة وعلى امور اخرى ما غادي لا يقدم لا يؤخر مسألة تشكيل الحكومة. بنكيران قال في تصريحاته الاخيرة ان اغلبيته اليوم غير المكتملة مشكلة من التقدم والاشتراكية والاستقلال بالاضافة الى حزبه العدالة والتنمية. الاتحاد الاشتراكي تلف كلشي نهار اه نهار اللا. كيفاوض على ثمن المشاركة. بنكيران فالحقيقة واخا يقدر يقبل الاتحاد باغي ومحتاج لحزب التجمع الوطني للاحرار. هادي قناعة شخصية وبعد التجربة يوضح مصدر ل"كود". بنكيران جرب فهاد 5 سنين العمل معاهم وماشي كيف كيكولو شي وحدين راه باغي يدخلهم باش يرضي القصر. اولا هو ماشي مخاصم مع القصر وثانيا وهاذا هو الاهم ما كال ليه حتى حد دخل هادا ولا خرج هادا حقاش عارفين باللي ما يقدروش يكولو ليه وهو عندو حرية كاملة للاختيار دابا يضيف مصدر "كود".
لكن دخول التجمع الوطني للاحرار للحكومة بحال الاتحاد الاشتراكي٬ مرتبطة بشروط. شرط اخنوش مازال هو هو وما غاديش يتغير وفق مصدر "كود". حكومة منسجمة تخدم ماشي حكومة تفركع بعد عام كيفما وقع للنسخة الاولى من حكومة بنكيران نيت. عليه الفيتو التجمعي على مشاركة الاستقلال ماشي ضد الحزب او ضد شباط ولكن حقاش استافد من التاريخ القريب وما باغيهش يتكرر يوضح المصدر نفسه. هاد الشي كيعني ان اخنوش واضح مع بنكيران يشرح مصدر "كود". ايلى بغيتي الاستقلال الله يسهل عليك ونتمنى ليك التوفيق من كل قلبنا ولا بغيتي التجمع ها شرطنا واجينو نخدمو يقول المصدر نفسه ل"كود".
واش هاد الشي عندو علاقة بشي جهة معينة كتابع المفاوضات؟ غالط اللي يعتقد ان اخنوش رغم كل ما احيط بعودته ورئاسته للحزب غادي يتحكم فيه شي حد. راه باين وواضح كيف يخدم ومع من كيخدم. عندو الحرية يختار ودابا راكم شفتو من نهار بدات المفاوضات خطو واضح ما كيلعبش واختار هو اللي يكون المفاوض ما يكون معاه حد باش ما توقعش مشاكل يشرح مصدر تجمعي ل"كود". راه ماشي دمية تحرك من الخلف واللي فكر هاكا غالط" يضيف المصدر
على هاد القبال ايلى كانت البي جي دي كتنتظر شي تدخل للضغظ على اخنوش او غيره لتليين مواقفه راهم غالطين. غير صحاب العدالة والتنمية عندهم قراءة اخرى قراءة فيها اش وقع قبل. بالنسبة ليهم هاد البلوكاج مقصود وتفكر فيه قبل. قبل الانتخابات وما تعرض له الحزب خاصة فالمسيرة الشوهة نهار تعلنات النتائج وميساج وزير الداخلية محمد حصاد الخايب ضد الحزب والتحالفات بعد النتائج والاجتماع الشهير ديال 8 اكتوبر ديال المعارضة لتشكيل اغلبية حتى قبل ما يعين الملك محمد السادس بنكيران رئيسا للحكومة مكلفا بتشكيلها ثم المفاجأة ديال عودة اخنوش للحياة الحزبية ورئاسته للاحرار وتحالفه مع الاتحاد الدستوري. اعتبروه ناس البي جي دي سد عليهم الباب وحيد الاتحاد الدستوري اللي كان ممكن يكون ورقة فالتحالف الحكومي الحالي٫ بالاضافة الى الموقف الغريب للحليف السابق الحركة الشعبية اللي ربطات المشاركة ديالها بمشاركة "الاحرار". البي جي دي كيقرا اللي واقع اليوم بهاد الشي. الاحرار كيقرا اليوم بقراءة اليوم. رسالته لبنكيران "حنا اولاد اليوم وخاصنا نشوفو المستقبل. بغيتنا نخدمو معا مرحبا ولكن ماشي مع الاستقلال ماشي مع شباط. حقاش انت عارف وحنا عارفين ان حكومة فيها الاستقلال والحزب غادي يكون عندو امين عام جديد كيعني حكومة ما غادياش تكمل عام. وحنا ما قابلينش هاد المغامرة. بغينا حكومة بلا استقلال ولا خلينا وسير الله يكمل عليك".