اخنوش شاد فطريقو وبدا يطبع حزبو بصمتو وشخصيتو: عاطفي وديما عزيز عليه يربح التحدي. كلشي كان كيتسنى قبول اوتوماتيكي للمشاركة فالحكومة وصدمهم

لقاء الاثنين بين رئيس الحكومة المعين عبد الاله بنكيران ورئيس التجمع الوطني للاحرار عزيز اخنوش كان يعتقد الكثيرون انه مجرد لقاء "شكلي". لماذا؟ لان لقاء الاسبوع الماضي بين مستشاري الملك عمر القباج ومحمد المنوني ببنكيران ورسالة محمد السادس بتسريع الحكومة فهم منها انها رسالة الى الاحزاب اللي ما حسماتش امر المشاركة فالحكومة باش تقبل تشارك. هاد الشي ينطبق بالخصوص على حزب التجمع الوطني للاحرار اللي قبولو المشاركة غادي يحل البلوكاج الحكومي.
فهاد القراءة اللي كيتحدث على ان اللقاء كان غادي يكون شكلي تم استحضار كون عزيز اخنوش صديق القصر او صديق الملك وان محمد السادس سبق فطر عندو وانه تمت الاستعانة به في اخر دقيقة لتعويض صلاح الدين مزوار اللي فعفع حزبو وخرج عليه.
هاد الشي كاين ولكن تنسات حاجة مهمة وهي طبيعة شخصية عزيز اخنوش المختلفة كثيرا عن مزوار. اخنوش بين باللي عندو هامش للتحرك والدليل انه باش خرج من اللقاء قال ان حميد شباط وطبعا حزب الاستقلال مازال عقبة امام هاد التحالف ووظف معطيات انية متعلقة بتصريحه حول حدود المغرب التاريخية وهاد الشي قلق موريتانيا. هنا كال للسياسيين وربما في المقام الاول لعبد الاله بنكيران ما تعاملوش معايا كواجهة ما تعاملوش معايا كمرسول لشي جهة. بدلو تعاملكم. انا رئيس حزب. كولو عليه اللي بغيتو حقكم ولكن عندو شخصيتو الجديدة وعندو استقلاليتو فاتخاذ قرارات حتى امر المشاركة فالحكومة وبعد لقاء بنكيران بمستشاري الملك٬ ما كيعنيش اننا نسدو علينا وندخلو للحكومة. شروطنا ما تغيراتش. بغينا قبل ما ندخلو نعرفو على اي برنامج وشكون هاد الفرقة اللي غادية طبقو واللي من الشروط الاساسية فيها خاصها تكون فرقة ديال بصاح اي منسجمة قوية عندها تجربة.
حتى اللي كانو ديما كينتاقدو اخنوش فوسائل التواصل الاجتماعي وكيعتابروه ما كيفهمش فالسياسة وووو غير بعضهم موقفو. بداو كيقرو انه نوع اخر من السياسيين. كينساو هادو خاصة ناشطين او متعاطفين مع حزب العدالة والتنمية واحد الامر مهم وهو العلاقة الخاصة اللي جمعات بنكيران باخنوش. بنكيران عاطفي وهو كيدير السياسة. اخنوش حتى هو عاطفي. حاجة اخرى عارفها بنكيران واللي كيخدم مع اخنوش هو انه بصاح "اغراس اغراس" وباش كيدخل لشي مشروع بحال رئاسة الحزب كيوظف بالاضافة الى العقلانية فالتدبير العاطفة بزاف اي كيخدم من قلبو والتحدي اللي عندو ديما هو ينجح هو يتميز ويحافظ على استقلاليتو. من يعرفه جيدا اوضح ل"كود" انه واهم من يعتقد ان اخنوش يتحرك بالتعليمات. منذ ان اصبح رئيسا للحزب يضيف المصدر ل"كود" "عارف فين غادي واش باغي وكلشي اللي كيديرو كيديرو انطلاقا من قناعاتو وايمانو وافكارو وما كيتسنى من حد يقول ليه اش يدير. اللي كيفكر من السياسيين بحال هاكا راه غالط وخاطئ".
اخنوش وفق المصدر نفسه ل"كود" ما غاديش يتنازل على حكومة منسجمة بناس ما يقدروش يهدموها من غدا. عطى كلمتو لبنكيران باللي ايلى قبل بهاد الشرط يتحاسبو على النتائج فالقطاعات اللي غادي يشرف عليها. بنكيران متأكد ان فريقو غادي ينجح ولكن عقبة الاستقلال موقفة الحكومة لحد الان. قيادي من العدالة والتنمية اكد ل"اخبارر اليوم" ان بنكيران متشبث بالاستقلال واخا كاعي على تصريحات شباط والاستقلاليين ضد اخنوش والتجمعيين وما قاله عن موريتانيا.